Köngulær hafa allt upp í fern augnapör til að sjá sem best.

Tvö augu hafa a.m.k. fjóra kosti umfram aðeins eitt stakt auga. Í fyrsta lagi hefur dýrið auga til vara, ef annað augað skyldi eyðileggjast. Í öðru lagi verður sjónsviðið víðara. Eineygt fólk hefur 150 gráðu lárétt sjónarhorn en með tvö augu náum við 180 gráðum. Hjá mörgum fuglum eru augun á hliðunum og þeir ná því að sjá nánast allan hringinn án þess að snúa höfðinu. Í þriðja lagi veita tvö samhliða augu mun nákvæmara fjarlægðarskyn og um leið nákvæmar upplýsingar um fjarlægðina til bráðarinnar, svo dæmi sé tekið. Og í fjórða lagi auka tvö augu til muna hæfnina til að greina veik sjónboð.

Sumar eðlur, froskar og fiskar hafa þriðja augað ofan á höfðinu og köngulær hafa allt upp í fern pör af augum.