Ný tækni sem á að koma í veg fyrir árekstra í umferð, er nú prófuð með litlum vitvélum.

Vísindamenn hjá bílaframleiðandanum Nissan hafa þróað nýja tækni til að koma í veg fyrir árekstra í umferð og hugmyndin er sótt í hreyfingamynstur í fiskitorfu. Í tilraunum sínum nota vísindamennirnir hóp þríhjóla vitvéla, sem þeir kalla Eporo. Hvert tæki notar innbyggðan leysi til að greina fjarlægð og komast hjá árekstri.

Vitvélarnar hegða sér svipað og fiskitorfa og útlínur alls hópsins taka á sig nýja mynd ef aksturssvæðið breytist. Á þröngri leið leitast tækin við að mynda röð fremur en að vera hlið við hlið. Nú er unnið að því að yfirfæra tæknina til að nota í bílum framtíðarinnar.