Samvaxnir einstaklingar eru algengir meðal skriðdýra. Þessi unga, tvíhöfða skjaldbaka fannst árið 2005 á fljótsbakka, ekki langt frá Havana, höfuðborg Kúbu.

Samvaxnir tvíburar eru ekki óþekkt fyrirbrigði í dýraríkinu. Oftast sést þetta meðal húsdýra og í dýragörðum. Ástæða þess er þó líklega sú að þessi dýr eiga litla lífsmöguleika úti í villtri náttúru. Undantekningar finnast þó. Í september árið 2005 fannst ung tvíhöfða skjaldbaka á Kúbu. Þessi skjaldbaka var vandlega rannsökuð af sérfræðingum sædýrasafns í nágrenninu og reyndist fullfrísk og heilbrigð og hafði greinilega náð að lifa eðlilega.

Af einhverjum ástæðum eru samvaxnir tvíburar algengastir meðal skriðdýra. Ekki kunna vísindamennirnir þó neina skýringu á þessu. Yfirleitt er samvöxturinn ekki mjög alvarlegs eðlis. T.d. eru þekkt fjölmörg dæmi um tvíhöfða slöngur og tvíhöfða skjaldbökur. Yfirleitt hafa höfuðin hvort sinn heila en líffæri líkamans eru sameiginleg. Þessi þétta tenging kemur þó ekki í veg fyrir að höfuðin tvö sláist um matinn, sem auðvitað getur orðið til vandræða.

Húsdýr, svo sem hestar, kýr og kindur geta einnig eignast tvíhöfða afkvæmi og í sumum tilvikum með fleiri en fjóra fætur. Meðal fugla er á hinn bóginn algengara að aðskilnaður verði í aftari hluta líkamans. T.d. er ekki óalgengt að sjá hænu- eða andarunga með fleiri fætur en tvo.