Þrátt fyrir “djöfullegt” framferði á köflum var hljómsveitin Judas Priest sýknuð af að hafa falið lofgerð um djöfulinn í textum sínum.

Bítlarnir, Led Zeppelin, The Eagles og fleiri hljómsveitir hafa verið sakaðar um að dylja svokallaðan “afturábakboðskap” í textum sínum. Hljómsveitin Judas Priest sætti ákæru árið 1985 fyrir að hafa orðið völd að sjálfsvígum tveggja pilta með djöflatrúarboðskap. Hljómsveitin var þó sýknuð, m.a. vegna þess að verjandanum tókst að sýna fram á að heyra mætti ámóta boðskap í trúarlegri tónlist ef menn vildu.

Bandarísku sálfræðingarnir John Vokey og Don Read komust að sömu niðurstöðu í rannsókn sinni. Ef fólk var látið hlusta á lag aftur á bak án nokkurra skýringa, heyrðu innan við 10% dulinn boðskap í textanum. Væri fólk aftur á móti beðið að hlusta eftir síkum boðskap fór hlutfallið hins vegar skyndilega yfir 90%.

Mikið af ásökunum um dulinn boðskap aftur á bak, á rætur meðal hægri sinna í Bandaríkjunum, þar sem fjöldi samtaka, ekki síst “Moral Majority” hefur árum saman haldið því fram að rokktónlistin sé orsök nokkurn veginn alls ills. En eins og meðlimir hljómsveitarinnar Judas Priest bentu á, væri það ekki góð markaðssetning að hvetja aðdáendur til að svipta sig lífi. Ætti á annað borð að koma fyrir duldum boðskap í textanum myndu þeir fremur velja að setja “Kauptu fleiri plötur” inn í textann.