Epli og rósir tilheyra sömu ætt. Skyldleikann má t.d. sjá með því að bera saman blóm villirósarunna og eplatrjáa.

Eplið og rósin tilheyra reyndar sömu plöntuættinni, nefnilega rósaætt, sem á latínu kallast Rosaceae. Þetta er stór ætt og henni tilheyra 3-4 þúsund tegundir, ýmist jurtir, runnar eða tré. Auk rósa og epla má t.d. nefna jarðarber og kirsuber.

Þótt allar þessar plöntur virðist afar ólíkar hver annarri, hafa þær ákveðin sameiginleg einkenni, sem grasafræðingar leggja áherslu á þegar þeir ákvarða skyldleika plantna. Flestar plöntur af þessari ætt hafa t.d. blöð á stilkum sem ekki sitja andspænis hver öðrum á stilknum eða greininni. Það er líka dæmigert að krónublöðin séu fimm og bikarblöðin sömuleiðis fimm talsins. Þau eru oftast græn og sitja undir krónublöðunum. Í blóminu eru líka yfirleitt margir frævlar.

Rósaætt skiptist í fjórar undirættir sem áður voru taldar alveg aðskildar ættir. Rósir og jarðarber eru af sömu undirætt, epli af annarri og kirsuberin af þeirri þriðju, svo nokkuð sé nefnt. „Gamall“ grasafræðingur myndi sem sagt svara því til að rósir og epli væru ekki af sömu ætt, en nú teljast sem sagt fjórar áður sjálfstæðar ættir allar vera undirættir rósaættarinnar.

"