Hraðvirkasta aðferðin felst í því að farþeginn sem fær aftasta gluggasætið fari fyrstur um borð og síðan þeir sem hafa gluggasætin sömu megin, þó þannig að hlaupið sé yfir aðra hverja röð. Því næst koma gluggafarþegarnir hinum megin. Einfaldari en ekki alveg jafn fljótvirk aðferð felst í því að hleypa farþegum um borð í fjórum aðskildum hópum.

Stærðfræði

Allir sem ferðast hafa með farþegaþotum þekkja þann vanda sem skapast þegar farþegar koma um borð. Gangurinn stíflast þegar fólk er að koma handtöskum fyrir í farangurshólfum og það getur oft tekið langan tíma. Þennan vanda hefur pirraður geimvísindamaður nú leyst. Orðinn hundleiður á biðinni ákvað Jason Steffen hjá Fermilab í Illinois að nota svokallaðan Monte Carlo-algóritma til að finna fljótlegustu leiðina til að raða farþegum um borð. Algóritminn er annars notaður til að greina hvernig frumeindir og sameindir raða sér.

Niðurstaðan kom á óvart. Sú aðferð sem oftast er notuð og byggist á því að farþegar raði sér í sætin aftan frá, er sú sem tekur næstmestan tíma. Enn lengri tíma tekur það þegar farþegarnir í fremstu sætunum fara fyrstir inn. Útreikningar Steffens sýndu að besta útkoman næst þegar sem allra flestir farþegar hafa tóma sætaröð á milli sín og þeirra sem fóru um borð næst á undan eða eftir. Þannig hafa allir tóm til að koma farangri sínum fyrir án þess að loka ganginum fyrir öðrum. Allra fljótlegasta aðferðin byggist á því að hver farþegi fái ákveðið biðraðarnúmer, en með þeirri aðferð mætti koma 240 farþegum í sæti sín á sjöföldum hraða.