Hálfapinn Aye aye lifir á Madagaskar. Hann hefur aðeins neglur á stórutánum, en annars klær.

Flestir prímatafræðingar álíta neglurnar hafa þróast samhliða gripfærni handanna. Neglurnar styðja og verja fingurgómana en gera okkur jafnframt fært að klóra okkur. Fætur og tær mannsins hafa vissulega ekki lengur neina gripfærni, svo löngu eftir að maðurinn tók að ganga uppréttur, en engu að síður veita táneglurnar tánum bæði nokkurn stuðning og vernd.

Allir prímatar hafa eina eða fleiri flatar neglur yst á fingrum og tám til að auka gripfærnina. Reyndar eru flatar neglur einmitt oft notaðar sem hluti af skilgreiningu prímata. Neglur hafa þróast úr klóm sameiginlegs forföðurs sem hefur verið skordýraæta og átt margt sameiginlegt með nagdýrum. Nánasti núlifandi ættingi prímata er trjásnjáldurmúsin (tupaiae), sem líkist prímötum að mörgu leyti og hefur m.a. stóra heilaskel, en hefur hins vegar varðveitt klær á öllum fótum. Rétt eins og hjá svo mörgum öðrum spendýrum gagnast þessar klær vel til að grafa, skrapa og klifra upp í tré.

Þótt það einkenni prímata að hafa neglur, er þó einnig algengt að prímatar hafi eins konar blöndu af nöglum og klóm á fingrum og tám. Prímati sem kallast aye aye hefur þannig klær á öllum fingrum og tám, nema stóru tánum þar sem eru neglur. Og ekki eru heldur neglur allra prímata jafn flatar og breiðar og okkar neglur. T.d. hafa suður-amerískir apar yfirleitt mjórri neglur en apar í Afríku og Asíu.