Hubble-sjónaukinn tók þessa mynd af staðnum þar sem áreksturinn varð. Svarti bletturinn er efnisský.

Þann 19. júlí 2009 skall lítill himinhnöttur á Júpíter og skildi eftir sig nýjan, dökkan blett á þessari risareikistjörnu.

Þegar bletturinn var sem stærstur samsvaraði hann um tvöföldu flatarmáli allra Bandaríkjanna. Svo öflugir árekstrar eru taldir afar sjaldgæfir og vísindamenn því hissa á að verða vitni að slíkum atburði aðeins 15 árum eftir að halastjarnan Shoemaker-Levy 9 hvarf inn í Júpíter 1994.

Fyrstu athuganir á nýja blettinum benda til að himinhnötturinn hafi verið á stærð við allmarga fótboltavelli. Sprengingin er álitin hafa verið meira en þúsundfalt öflugri en sú sem varð í Tunguska í Síberíu 1908, þegar halastjarna eða loftsteinn sprakk og brann upp í gufuhvolfinu.