Silfurrakettan - eða Bend Rosemeyer - í kappaksturbíl sínum fyrir banaslysið. Hann varð aðeins 28 ára gamall.

Hinn vinsæli þýski kappakstursökumaður, Bernd Rosemeyer, þekktur sem Silfurrakettan, er allur eftir kappakstur við landa sinn Rudolf Caracciola.

Ríkiskanslari Þýskalands, Adolf Hitler, orðaði fyrr um árið ósk um að hraðametið á landi skyldi sett af þýskum manni í þýskum bíl á þýskri hraðbraut. Fremstu kappakstursmenn okkar tíma létu í gær draum Hitlers rætast þegar þeir – til að slá heimsmetið – keyrðu eftir afgirtum kafla á mótorveginum milli Frankfurts og Darnstadts.

Rudolf Caracciola ræsti fyrstur í Mercedes Benz bifreið sinni. Hann sló fyrra met með hraða sem nam 432,69 km/klst.

Áður en Silfurrakettan hélt af stað varaði Caracciola hann við um mikinn hliðarvind á brautinni – en án árangurs. Þessir tveir hæfileikaríku ökumenn hafa verið keppinautar um áraraðir og skipst á nýjum hraðametum á bæði lokuðum brautum og afgirtum opinberum vegum. Silfurrakettan hundsaði viðvörunina, settist á bak við stýrið í Autounion-kappakstursbíl sínum og rauk af stað.

9,2 km síðar missti hann stjórn á ökutækinu sem fór margar veltur og endaði utan vegar. Þegar aðstoð barst á slysstað fannst Bernd Rosemeyer látinn í meira en 100 m fjarlægð frá bílflakinu.

Rétt fyrir slysið var hraðinn meira en 433 km/klst. – nýtt hraðamet á opinberum vegi. Afrekið reyndist Rosemeyers síðasta.