Fálmarakönguló situr með ungana í kringum sig. Móðirin gælir við afkvæmi sín með fálmurunum og systkin geta líka kunnað að meta snertingu hvors annars.

Líffræði

Sumar köngulær láta vel að móður sinni og systkinum og halda þannig nánu sambandi. Þetta hafa bandarískir vísindamenn við Cornell-háskóla nú uppgötvað.

Vísindamennirnir rannsökuðu tvær tegundir, Phrynus marginemaculatus, sem er algeng í Flórída og svo miklu stórvaxnari tegund, Damon diadema, sem lifir í Tansaníu og Kenýu. Báðar tegundirnar eru svonefndar fálmaraköngulær sem eru frábrugðnar öðrum köngulóm að því leyti að þær nota aðeins sex af átta fótum til að ganga. Tveir fætur hafa þróast í eins konar fálmara sem nota má til að rannsaka umhverfið.

Í glerbúrum rannsóknastofunnar sýndu báðar tegundirnar greinilega félagslega hegðun. Einkum var náið samneyti milli systkina og mæðra. Oft sat móðirin með unga sína í kringum sig og strauk þeim bæði um kroppinn og fálmarana með sínum eigin fálmurum. Ungar af annarri tegundinni endurguldu meira að segja þessar strokur og hið nána samneyti hélt áfram eftir að ungarnir voru orðnir kynþroska.