Klónaðir maurar geta ræktað fleiri sveppi, hver um sig, en venjulegir maurar.

Maurategundin Mycocepturus smithii hefur komið vísindamönnum á óvart. Nýjar DNA-rannsóknir sýna annars vegar að allir maurarnir eru kvenkyns, hins vegar að þeir fjölga sér án nokkurra kynmaka.

Allir maurar í hópnum eru sem sé klón – erfðafræðilegar eftirhermur af drottningunni, sem öllu ræður. Þetta eru niðurstöður rannsókna á maurum á Amasónsvæðinu. Anna Himler hjá Arizona-háskóla stýrði rannsóknunum. Kynlaus fjölgun karldýra var áður þekkt en kynlaus fjölgun kvendýra af þessu tagi hefur ekki sést áður. Þegar vísindamennirnir rannsökuðu kynfæri mauranna nánar, kom í ljós að Mycocepturus smithii hefur alveg glatað fjölmörgu af því sem yfirleitt nýtist dýrum til fjölgunar. Anna Himler segir bæði kost og löst á því að fjölga sér án kynferðissamskipta. Einn kosturinn er sá að maurarnir geta einbeitt sér að því að afla fæðu með því að rækta sveppi. Og til gallanna má telja að maurarnir eru auðveld bráð fyrir sníkjudýr þar eð ónæmiskerfið er nákvæmlega eins í þeim öllum.