Jafnvel lítil börn geta notað stýripinna og stóllinn sér sjálfur um að koma í veg fyrir árekstur

Ný vitvél getur nú hjálpað jafnvel mjög ungum börnum að stýra litlum hjólastól. Yfirleitt þurfa fötluð börn að vera orðin 5-6 ára áður en þau fá hjólastól og það er allt of seint, segja Bandaríkjamennirnir tveir sem smíðuðu þetta tæki, sjúkraþjálfarinn Cole Galloway og verkfræðingurinn Sunil Agrawal við Delaware-háskóla. Heili ungra barna örvast og þroskast í samhengi við hreyfingar þeirra, svo sem þegar þau skríða um og rannsaka heiminn á hverjum degi.

Fyrri rannsóknir hafa sýnt að allt niður í 7 mánaða gömul börn geta notað stýripinna og það var því ekki sá hluti verksins sem olli uppfinningamönnunum mestum vanda.

Helsta vandamálið vð að setja ársgamalt barn í rafknúinn hjólastól með stýripinna, felst í því að barnið nær ekki alltaf að stýra framhjá hindrunum eða nema staðar í tæka tíð. Frumgerð tækisins er því búin skynjurum sem senda boð til aðaltölvunnar um að stöðva stólinn áður en árekstur verður, eða jafnvel að óhætt sé að fara yfir smáhluti ef það skapar örugglega enga hættu. Auk þess sem tækið veitir ungum börnum betri þroskamöguleika, fá þau jafnframt meiri möguleika til að umgangast jafnaldra sína.