Pappírsflaug sem þolir sjöfaldan hljóðhraða er hér undirbúin fyrir tilraun í vindgöngum.

Geimferðir

Flugverkfræðingur við háskólann í Tokyo hyggst nú biðja næsta japanska geimfarann að taka með sér 100 pappírsflugvélar og kasta þeim út úr alþjóðlegu geimstöðinni. Þetta hljómar óneitanlega sem einhvers konar brandari, en tilraunin er reyndar gerð í fyllstu alvöru, því vísindamennirnir hyggjast þróa lítil og létt geimför sem snúið geti aftur til jarðar.

Það er prófessorinn Shinji Suzuki sem hefur þróað pappírsflaugarnar í samstarfi við japönsku Origami-samtökin, en origami er heiti á ævafornri japanskri hefð við að brjóta pappír. Pappírsflaugarnar eru 20 sm langar og nefstuttar til að draga úr hitamyndun þegar þær berast inn í gufuhvolfið. Þær eru gerðar úr sérstökum, kísilblönduðum pappír, sem hefur meira hitaþol.

Tilraunir í vindgöngum hafa sýnt að pappírsflaugarnar þola allt að sjöfaldan hljóðhraða og hátt í 200 stiga hita. Það eru sem sagt nokkrar líkur til að einhverjar þeirra gætu borist alla leið niður til jarðar.

Það er á hinn bóginn erfitt að sjá fyrir hvar pappírsflaugarnar muni lenda og tölfræðilega má gera ráð fyrir að flestar lendi á hafi. Suzuki hyggst því setja á pappírinn texta á fjölmörgum tungumálum þar sem finnendur eru hvattir til að koma flaugunum til skila. Næsta kynslóð slíkra flauga verður trúlega búin útvarpssendi sem gerir þær finnanlegri.