Tvíbytnan er 31 m löng og nærri 15 m breið. Þilfarið er alþakið sólföngurum.

Með alveg sérstakri maraþonsiglingu á næsta ári á nú fyrir alvöru að beina sjónum að endurnýjanlegum orkugjöfum. Tvíbytnan PlanetSolar á að hefja ferð sína í Miðjarðarhafinu og fara kringum hnöttinn á sólaorkunni einni saman. Báturinn er 31 m á lengd og tæpir 15 m á breidd. Hæðin er 7,4 metrar. Hámarkshraðinn verður 8 hnútar eða rétt innan við 15 km/klst. og nýþróaðar liþíumrafhlöður knýja bátinn áfram. Rafhlöðurnar fá hleðslu frá sólföngurum sem þekja nánast allt þilfarið.

Farkosturinn hefur verið á teikniborðinu hjá Svisslendingnum Raphael Domjans síðan 2004 og skipasmiðirnir hjá Knierim Yacht Club í Kiel í Þýskalandi hafa unnið að smíðinni í 13 mánuði. Smíðin hefur verið tímafrek vegna þess að menn hafa m.a. þurft að hugsa staðsetningu sólfangaranna upp á nýtt og þeir þurfa líka bæði að þola umgang manna og það breytilega veður sem gera verður ráð fyrir. Einnig hafa menn þurft að leggja hugsun, tíma og peninga í straumlínulögun, rafgeyma og hagfellt vélkerfi til að knýja skipið áfram.

Þegar Raphael Domjan leggur upp í hnattsiglingu sína verður ævintýra- og stjórnmálamaðurinn Gérard d‘Aboville með í för, en hann varð m.a. fyrstur til að róa báti þvert yfir Atlantshafið.