Sjálfkeyrandi bílar eiga að læra að hræðast

Til að komast hjá slysum þurfa sjálfkeyrandi bílar að kunna að hræðast. Með því að mæla og skrá púls tilraunaþátttakenda við ýmsar aðstæður lærir tölvan hvaða aðstæður hún þarf að forðast.

Tækni

Lestími: 2 mínútur

 

Gervigreindartölvur geta nú leyst fyrir okkur æ fleiri verkefni og innan tíðar munum við einnig treysta þeim til að keyra bílana okkar.

 

Ætlunin er að nýta hæfni gervigreindartækninnar til að bæta við sig þekkingu til að gera gervigreindartölvur að betri og traustari bílstjórum en við erum sjálf og þessi þróun er komin vel áleiðis.

 

Þær geta nú þegar fylgt umferðarreglunum, virt hraðatakmarkanir og skynjað umhverfi bílsins.

 

Engu að síður telja vísindamenn hjá Microsoft að tölvurnar skorti enn nauðsynlegan eiginleika: Þær kunna ekki að hræðast.

 

En þetta eiga þær nú að læra.

 

Lestu einnig:

 

Í tilraun var tölva látin fylgjast með þátttakendum sem sendir voru í bíltúr í ökuhermi.

 

Til að fylgjast með óttaviðbrögðum þátttakenda voru þeir látnir bera púlsmæla, enda gefur púlsinn ágæta mynd af óttaviðbrögðum okkar og aðferðin er einföld.

 

Gervigreindartölvan gat nú tengt einstök atvik í akstrinum við óttaviðbrögð þátttakenda, m.a. þegar þeir enduðu utan vegar í ökuherminum.

 

Sjálfsnámskerfi eru oft notuð í gervigreindarþróun en þá lærir tölvan af eigin reynslu.

Eftir ökuferðina var tölvan látin aka sömu leið og hún gætti sín og fór afar varlega þar sem hún hafði greint óttaviðbrögð þátttakanda í tilrauninni.

 

Gervigreindartölva í sjálfkeyrandi bíl verður varkárari eftir að hafa lært hvaða aðstæður koma mannshjartanu til að slá hraðar.

 

Slysatíðnin lækkaði

 

Vísindamennirnir báru nú þessa tölvu saman við aðra gervigreindartölvu sem ekki hafði kynnst ótta manna, heldur aðeins lært af eigin mistökum í akstrinum.

 

Í ljós kom að tölvan sem lært hafði á óttaviðbrögðin, var miklu fljótari að ná öryggi í akstri og þegar þær höfðu báðar náð á sama stig, hafði óttaviðbragðatölvan 25% færri óhöpp að baki.

 

Birt 21.08.2021

 

 

 

JENS MATTHIESEN

 

 

(Visited 256 times, 1 visits today)

Tengdar Greinar

No Content Available

FULLUR AÐGANGUR AÐ VEFNUM Í 14 DAGA FYRIR 0 KRÓNUR

PRÓFAÐU 14 DAGA FYRIR 0 KRÓNUR