„Netflix gerir tilraun til að skapa glundroða og bera út rógburð um að egypsk menning eigi rætur að rekja til þeldökkra, segir hinn virti egypski fornleifafræðingur Zahi Hawass.
Viðbrögð hans komu í kjölfarið á frumsýningu nýrra leikinna heimildaþátta um Kleópötru, drottningu Egypta (69-30 f.Kr.).
Þeldökk leikkona var fengin til að leika Kleópötru í þáttunum og þetta hefur haft í för með sér mikla gagnrýni af hálfu Egypta, Grikkja og Makedóníumanna.
MYNDSKEIÐ: Sjáðu Netflix-stikluna um Kleópötru
Grískir forfeður
Engar ritaðar heimildir greina frá kynþætti Kleópötru en ákveðnir þættir eru þó eins konar vísbendingar um uppruna drottningarinnar.
Sagnfræðingar vita að Kleópatra fæddist inn í konungsætt sem hinn makedónsk-gríski Ptólemaios 1. lagði grunninn að einum 250 árum áður.
Konungsætt þessi var þekkt fyrir að leggja stund á innrækt til þess að menga ekki blóð konungborinnar fjölskyldunnar. Afi Kleópötru átti sér engu að síður ástkonu, auk grískra eiginkvenna sinna, með óljósan uppruna.
Hún gæti fræðilega séð hafa verið amma Kleópötru en sannanir fyrir því skortir og engar heimildir þess tíma gefa til kynna að ástkonan hafi verið svört.
Faðir Kleópötru er einnig sagður hafa átt nokkrar konur og ef marka má gríska sagnfræðinginn Strabon voru þær allar af tignum ættum. Fyrir vikið hafa þær sennilega verið Grikkir ellegar þá tilheyrt trúarlegu prestastéttinni í Grikklandi sem hefðin bauð að kvænast grískum konum.
Uppgötvun dularfullrar grafskriftar í Norður-Grikklandi rekur þræði aftur til óhugnanlegrar valdabaráttu sem hófst þegar Alexander mikli gaf upp öndina. Þar með hófst valdabarátta í makedónska ríkinu og henni lauk ekki fyrr en öll fjölskylda Alexanders lá í valnum.
Sagnfræðingar nú á dögum eru því sammála um að Kleópatra hafi annað hvort verið hreinræktaður Grikki eða átt gríska forfeður sem miklar líkur eru á að hafi ekki verið þeldökkir. Hún hefur því ugglaust líkst konum frá Miðjarðarhafinu.
Þessi kenning er jafnframt studd með styttum og mynt frá fornöld sem sýna andlit Kleópötru.
Hin mörgu andlit Kleópötru
Kleópatra er einhver alþekktasta persóna fornaldar og saga hennar hefur löngum vakið áhuga kvikmyndagerðarfólks. Fyrir vikið hafa verið gerðar mýmargar kvikmyndir um drottningu þessa, hver á sinn hátt.
Kleópatra (1934)
Hver lék Kleópötru?
Claudette Colbert
Hvernig kom hún fyrir sjónir?
Í kvikmynd þessari er Kleópatra slóttug og tælandi drottning, sem beitir fegurð sinni og snilligáfu til að öðlast yfirráð og komast til valda. Hún vílar ekki fyrir sér að svíkja sína nánustu og notar kynþokkann sem leið til að ráðskast með karlmenn og fá sínu framgengt.
Kleópatra (1963)
Hver lék Kleópötru?
Elizabeth Taylor
Hvernig kom hún fyrir sjónir?
Kleópatra er sterk, valdamikil drottning, með mikla útgeislun, sem er staðráðin í að vernda ríki sitt gegn ógninni sem steðjaði að frá Rómverjum. Drottningin er látin vera greind kona með stjórnmálavit, sem beitir engu að síður töfrum sínum til að ráðskast með aðra.
Kleópatra drottning (2023)
Hver lék Kleópötru?
Adele James
Hvernig kom hún fyrir sjónir?
Í þessum leiknu heimildaþáttum frá Netflix kemur egypska drottningin okkur fyrir sjónir sem sterk og valdamikil kona sem berst fyrir ríki sínu. Þó svo að þættirnir séu sagðir vera heimildaþættir kemur oftsinnis fram að Kleópatra hefði allt eins getað verið þeldökk.
