Það er reyndar ekki algilt að búmerang snúi aftur.

Upprunalega útgáfan sem frumbyggjar Ástralíu notuðu til veiða, flýgur vel og auðvelt að miða og hæfa með henni en þessi áhöld koma ekki til baka.

Hin sérhæfða útgáfa búmerangsins sem snýr aftur er yfirleitt gerð þannig að tveir vængir mynda sveigju ekki ósvipaða banana að lögun.

Það eru líka til aðrar gerðir með þremur eða fjórum vængjum eða jafnvel með allt annarri lögun. Vængir búmerangs eru yfirleitt ekki ósvipaðir flugvélavængjum. Þegar loft fer yfir og undir flugvæng skapast lyftikraftur sem þrýstir vængnum upp. Því hraðar sem vindur blæs um vænginn því öflugri verður lyftikrafturinn.

Þegar um er að ræða flugvél er vindhraðinn sá sami á báðum vængjum en öðru máli gegnir um búmerang sem snýst í sífellu í loftinu. Vængirnir hreyfast því til skiptist upp í vindinn og undan vindi og lyftikrafturinn er því mismunandi.

Búmerangi er ekki kastað lárétt eins og frisbídiski heldur er miklu nær því að kastið sé lóðrétt. Sá vængur sem er ofar fær því meiri lyftikraft. Mismunandi áhrif loftsins á vængina tvo fá búmerang til að fljúga í stöðugri sveigju allt þar til áhaldið kemur aftur á upphafsstað.