Allt að helmingur fólks hunsar líkamleg einkenni og óþægindi sem kunna að vera fyrstu ummerki um krabbamein.

Þetta kemur í ljós í rannsókn sem unnin var fyrir samtökin Cancer Research UK (bresku krabbameinsrannsóknarsamtökin) sem fjallað er um í grein í enska dagblaðinu „The Independent“.

Ástæða þess hve margir kjósa að leita ekki til læknis er að þeir óttast að „eyða tíma læknisins til einskis“, ef marka má rannsóknina.

Hér er að finna viðvörunarmerki um krabbamein

Þessi einkenni kunna að vera fyrstu ummerkin um krabbamein:

• Þrálátur hósti, hæsi ellegar erfiðleikar með að kyngja

• Hnútar undir húð

• Þrálátur eða viðvarandi niðurgangur eða hægðatregða

• Skyndilegt og óútskýrt þyngdartap

• Sár á líkamanum sem gróa ekki

• Blóð í uppköstum, þvagi eða saur

• Blæðingar utan hefðbundinna tíðablæðinga

• Tilfinning um að geta ekki tæmt þarmana eftir hægðalosun

• Fæðingarblettir sem stækka, breyta um lit eða lögun

• Þrálátir og óútskýrðir verkir

Krabbamein þarf að uppgötva snemma

Í rannsókninni sem bresku krabbameinsrannsóknarsamtökin létu gera á 1.700 Bretum yfir 50 ára tímabil kom í ljós að rösklega helmingur hafði fengið eitt eða fleiri snemmbæru viðvörunarmerkjanna án þess að leita læknis.

Langflestir þeirra höfðu sleppt því að fara til læknis sökum þess að þeir óttuðust að eyða tíma hans til einskis eða að vera álitnir ímyndunarveikir, á meðan aðrir fóru einfaldlega ekki vegna þess að þeir óttuðust að þeir gætu verið með krabbamein.

Við þetta bættist síðan stór hópur sem batt vonir við að einkennin og óþægindin hyrfu af sjálfu sér.

Það að trassa heimsókn til læknisins er það versta sem hægt er að gera þó svo að einungis eitt aðvörunarmerkjanna sé fyrir hendi, segir Dr. Richard Roope í viðtali við „The Independent“:

„Oft eru einkennin alls ekki ummerki um krabbamein en séu þau það hins vegar þá eru langtum meiri líkur á bata ef krabbameinið greinist fljótt.“

Leitið ávallt læknis ef krabbameinseinkenni gera vart við sig

Einkennin á yfirlitinu yfir snemmbæru ummerkin um krabbamein geta átt við um alls konar krabbamein, m.a. lungnakrabba, krabbamein í barka, ristilkrabba, eitlakrabbamein, blöðruhálskrabba, brjóstakrabba og húðkrabba.

Dr. Richard Roope sem starfar fyrir samtökin Cancer Research UK (bresku krabbameinsrannsóknasamtökin), segir aðeins eitt að gera ef minnsti grunur leikur á að um krabbamein sé að ræða:

„Þeir sem eru í minnsta vafa, ættu að láta rannsaka sig við fyrsta tækifæri. Við eyðum aldrei tíma læknisins til einskis ef um krabbamein er að ræða!“