„Lús“ táknar á tölvumáli villu í kóðanum sem lætur forrit senda frá sér villuboð eða jafnvel hrynja.
Bandaríski stærðfræðingurinn og tölvufræðingurinn Grace Hopper lýsti fyrstu þekktu „tölvulúsinni“ hinn 9. september 1947. Grace hafði átt þátt í að hanna tölvuna „Mark II“ við Harvard háskóla en dag einn komst vísindamannateymi hennar að raun um að tölvan virkaði ekki sem skyldi.
Þegar vísindamennirnir opnuðu kassann utan um tölvuna sáu þeir að skordýr hafði fest sig í einum rafliðanum í leit að hlýjum felustað. Hopper skráði síðan í dagbók sína að tölvan hefði virkað sem skyldi aftur eftir að hún hafði verið „aflúsuð“, þ.e. eftir að kvikindið hafði verið fjarlægð.
Fyrsta tölvulús sögunnar er til sýnis á þjóðminjasafni Bandaríkjanna, Smithsonian.
Þó svo að orðið „bug“ hafi fyrst verið notað í tengslum við tölvur árið 1947 hafði hugtakið verið notað yfir vélabilanir allt frá árunum upp úr 1870, þ.e. áður en rafeindatækni og tölvur þekktust.
Ekki er vitað hver notaði fyrst hugtakið „bug“ til að lýsa vélarbilun en það hlýtur að hafa verið fyrir árið 1878. Það ár nefndi uppfinningamaðurinn Thomas Edison orðið nefnilega í þessari merkingu í bréfi til samstarfsmanns síns:
„Svona hefur farið með allar uppfinningar mínar. Það koma upp vandræði, hitt og þetta hættir að virka sem skyldi og það er á þessu stigi sem „lýs“, líkt og slíkar smávillur og erfiðleikar kallast, gera vart við sig“.
Þegar Hopper og teymi hennar fundu dauðu lúsina árið 1947 höfðu þau sennilega hugmynd um að orðið „bug“ hefði verið notað yfir vélarbilanir áður fyrr. Vísindamannateymið fór hins vegar að nota hugtakið um tölvuvillur áður en öðrum hugkvæmdist sú merking.
LESTU EINNIG
