Á hverri einustu mínútu dælir hjartað fimm lítrum af súrefnismettuðu blóði út í alla afkima líkamans.

En jafnvel hjá ungu og að því er virðist fullfrísku fólki getur hjartað tekið upp á því að stöðvast skyndilega.

Á heimsvísu verða þetta árlega örlög milljóna og í 90% tilvika deyr fólkið.

Skyndilegt hjartastopp er þess vegna eitt þeirra heilbrigðisvandamála sem læknavísindin glíma við að skilja og koma í veg fyrir.

Nú hafa vísindamenn hjá Schmidt Heart-stofnuninni í Bandaríkjunum birt rannsóknaniðurstöður sem sýna að líkaminn sýnir oft fremur smávægileg einkenni á síðustu 24 tímunum fyrir hjartastopp og þessi einkenni virðast mjög ólík eftir kynjum.

Eitt einkenni sérlega algengt

Vísindamennirnir notuðu gögn úr tveimur mismunandi rannsóknum á hjartastoppi.

Þetta kemur fram í vísindatímaritinu Lancet Digital Health. Önnur var gerð í fjölkynþáttasamfélagi í Venturasýslu í Kaliforníu en hin í Portland í Oregon.

Þessar rannsóknir beindust að fólki á aldrinum 18-85 ára sem orðið höfðu fyrir skyndilegu hjartastoppi að einhverjum ásjáandi, í sumum tilvikum sjúkraflutningamönnum.

Í gögnunum greindu vísindamennirnir mismunandi einkenni fram að því augnabliki þegar hjartað stoppaði. Þetta voru bæði stök einkenni og tilvik þar sem fleiri einkenna hafði orðið vart.

Einkennin voru svo borin saman við einkenni hjá fólki sem hafði fundið svipuð eða sambærileg einkenni en náð að kalla til bráðahjálp og því komist hjá hjartastoppi.

Greiningarnar leiddu í ljós að 50% þeirra 823 einstaklinga sem fengu hjartastopp höfðu orðið vör við a.m.k. eitt einkenni allt að 24 tímum áður en hjartað hætti að slá.

Algengust var andnauð sem 41% hafði fundið fyrir síðasta sólarhringinn fyrir hjartastoppið.

33% fengu brjóstverk, 12% fengu svitaköst og 11% upplifðu það sem vísindamennirnir kalla áfallslíka virkni.

Áhugaverðast var þó að einkennin virtust talsvert mismunandi milli karla og kvenna.

Karlmennirnir höfðu orðið fyrir andnauð, brjóstverkjum og auknum svita en það gilti ekki um konur.