7 ósannar bábiljur um líkamann

Þurfum við virkilega að bíða í heila klukkustund með að fara í sund eftir máltíð? Fáum við gigt af því að láta smella í fingrunum? Hér ætlum við að velta fyrir okkur sjö lífseigum bábiljum um líkamann.

Lestími: 5 mínútur

1. Farðu í föt svo þú kvefist ekki

Þú varst ekki nógu vel klædd(ur) …

Ekki skortir athugasemdir þeirra sem eru hyggnir eftir á þegar við fáum háan hita og horinn lekur niður úr nefinu á okkur.

Enn sem komið er hafa engar rannsóknir þó leitt í ljós samhengi á milli kulda og aukinnar hættu á kvef- og flensuveiru.

Ástæða þess að margir kvefast og liggja hóstandi undir sænginni á köldum vetrarmánuðunum er sú að við verjum meiri tíma í aflokuðu rými innanhúss á þeim árstíma og okkur fyrir vikið hættara við veirusýkingum.

2. Bíðið í klukkustund með sundferð eftir máltíð

Mörg okkar muna eftir aðvörunum fullorðna fólksins fyrir sundferðir æskuáranna:

„Ekki fara beint í sund eftir matinn.“

Röksemdafærslan að baki þessari áminningu er sú að meltingin flytji blóðið til magans. Fyrir vikið verði minna blóð aukreitis fyrir vöðvana sem krampi geti frekar myndast í.

Engar rannsóknir hafa þó verið gerðar sem styðja þessa kenningu.

3. Tyggjó helst í líkamanum í sjö ár

Lífseigur hræðsluáróður gengur út á það að tyggigúmmí geymist í líkamanum í heil sjö ár ef okkur verður á að gleypa það og á skýringin að vera sú að það límist fast á innanverðan magann.

Bábilja þessi á þó ekki við rök að styðjast því tyggjóið fer nákvæmlega sömu leið í líkamanum og önnur fæða sem við innbyrðum sem táknar að líkaminn losar sig við það með hægðunum eftir u.þ.b. sólarhring.

4. Mestallur hiti stígur upp gegnum höfuðið

Staðhæfing þessi er oft notuð í því skyni að fá börn til að nota húfu.

Enn sem komið er hafa þó engar sannanir fengist fyrir því að við verðum fyrir miklu hitatapi gegnum höfuðið miðað við stærð þess.

Við missum líkamshita um allan líkama, þar sem við getum ekki hulið okkur. Höfuðið allt og þá einkum andlitið, eru þá eðlilega í mestri hættu.

5. Innan við fimm sekúndur – þá má borða það!

Æ, æ, æ! Þú ætlaðir að fara að stinga sælgætismola upp í þig en misstir hann á jörðina.

Iss, piss. Hann er bara búinn að liggja þar í fimm sekúndur …. eða hvað?

Vísindamenn við Rutgers háskóla hafa rannsakað yfirborð ýmissa matvæla í því skyni að kanna hversu fljótt bakteríur og óhreinindi setjast á þau.

Þeir rannsökuðu m.a. fæðutegundir á borð við vatnsmelónur, smurt brauð og sælgætishlaup sem datt á ferns konar yfirborð.

Í ljós kom að bakteríurnar settust á matvælin áður en svo mikið sem ein sekúnda var liðin.

6. „Epli á dag kemur heilsunni í lag“

Mikið rétt, epli eru heilnæm og gagnast heilsu okkar vel, einkum sökum mikils trefjamagns og C-vítamíns sem þau fela í sér.

Ef hins vegar veirur og bakteríur ráðast til atlögu við okkur eru því miður ekki miklar líkur á að epli geti komið okkur til bjargar.

7. Við fáum gigt af að láta smella í fingrunum

Margir þekkja hljóðið þegar smellt er í fingrum.

Þó eru engar sannanir fyrir því að smellir í fingrum geti leitt af sér slit- eða liðagigt.

Bandaríski læknirinn Donald Unger ákvað að sannreyna þessa gömlu kreddu á eigin líkama.

Hann lét smella í fingrum vinstri handar minnst tvisvar á sólarhring í 50 ár en lét þá hægri alveg afskiptalausa.

Þegar hann að fimm áratugum loknum lét rannsaka báðar hendurnar var engan mun á þeim að finna.

(Visited 4.548 times, 1 visits today)

Pin It on Pinterest

Share This

Fá þér
áskrift?

Við erum með fullt blað af spennandi greinum einsog þeim sem þú ert búin/n að vera að lesa og meira til.