Mannvistarleifar á uppgraftarstöðum í Suður-Þýskalandi hafa sýnt uppbyggingu tignarstigans í Evrópu á bronsöld.
Vísindamenn hjá Ludwig-Maximillians-háskóla og Max Planck-stofnuninni í Þýskalandi hafa tekið saman höndum um það stórverkefni að greina leifar úr 104 gröfum þar sem verið hafa býli sunnan við Augsburg.
Elstu grafirnar eru 4.750 ára en þær yngstu 3.300 ára gamlar.
Ríkir bronsaldarbændur fengu skartmuni í gröfina. Býlið erfðist frá föður til sonar.
Auk þess að aldursgreina grafirnar voru tekin DNA-sýni til að finna skyldleika.
Félagsleg misskiptning átti sér stað innan heimilisins
Til viðbótar voru mæld mismunandi ísótóp frumefnisins strontíums í tönnum. Hlutfall strontíum-ísótópa getur sýnt hvar viðkomandi var upprunninn, því mismikið er af ísótópunum í vatni og plöntum á mismunandi stöðum.
Niðurstöðurnar sýndu að ákveðinn kjarni íbúa á bændabýli var fjölskylda en til viðbótar var svo óskylt fólk.
Bronsöld í Evrópu
- Tími: Frá um 2000 f.Kr. til um 550 e.Kr.
- Heiti: Dregið af blöndu tins og kopars sem var útbreidd á þessum tíma.
- Samfélag: Dreifð býli, þorp og markaðsstaðir.
- Stjórn: Höfðingjaríki.
Meðlimir fjölskyldunnar fengu gjarnan verðmæta gripi með sér í gröfina. Vísindamennirnir draga þá ályktun að fjölskyldan hafi átt býlið en aðrir heimilismenn hafi verið vinnufólk eða jafnvel þrælar.
Mismunandi grafir ríkra og fátækra
Að ríkir og fátækir byggju þannig undir sama þaki var áður fyrst þekkt meðal Forn-Grikkja einum 1.500 árum síðar.
Vísindamennirnir gátu fylgt allt að fimm kynslóðum á hverju býli og ljóst varð að býlið gekk í arf frá föður til sonar.
Mæðurnar komu oftast annars staðar frá, oft úr 350 km fjarlægð.
