Óteljandi mýtur og misvísandi skoðanir eru til um hvaða matvæli geta aukið og dregið úr hættu á mismunandi tegundum krabbameins.
Nú hafa vísindamenn frá m.a. Háskólanum í Oxford reynt að varpa ljósi á tengslin á milli einnar banvænustu tegundar krabbameins, ristilkrabbameins, og fæðunnar sem við innbyrðum.
Í stórri rannsókn skoðuðu vísindamenn næstum 100 mismunandi matvæli og komust að því að ákveðin matvæli virðast draga úr hættu á krabbameini um 17 prósent en önnur virðast auka hættuna.
Rannsóknin birtist í Nature Communications og var unnin í samstarfi við vísindamenn frá m.a. Nýja Sjálandi og Bandaríkjunum.
Þessi matvæli draga úr hættu á ristilkrabbameini
Ristilkrabbamein er þriðja algengasta krabbameinið sem greinist í heiminum og er það krabbamein sem drepur næstflesta.
Rannsakendur skoðuðu gögn frá alls 542.778 konum.
Út frá 97 mismunandi fæðutegundum og næringarefnum reiknuðu þeir út sambandið milli fæðuneyslu kvenna og hættu á að fá krabbamein í ristli eða endaþarmi.
Greiningar rannsakenda sýndu að það virðist vera fylgni á milli inntöku ákveðins morgunkorns, ávaxta, trefja og C-vítamíns og minni hættu á ristilkrabbameini.
Á hinum enda kvarðans gátu rannsakendur séð að áfengi og unnið kjöt hafði að því er virðist neikvæð áhrif og jók hættuna á krabbameini.
Önnur mikilvæg uppgötvun var að „mjólkurvörur virðast skapa vörn gegn krabbameini í ristli eða endaþarmi,“ segja vísindamennirnir í rannsókninni.
Kalsíum gegnir stóru hlutverki
Vörur eins og mjólk og jógúrt reyndust draga úr hættu á ristilkrabba um 17 prósent. Vísindamennirnir telja að jákvæðu áhrifin séu vegna kalsíuminnihalds vörunnar. Þetta kemur fram í fréttatilkynningu.
Allt byrjar þetta með einni frumu sem skiptir sér skyndilega á óeðlilegan hátt og hættir þar með að hlusta á eðlileg vaxtarboð líkamans.
Þegar rannsóknarhópurinn skoðaði áhrif kalsíums, öðru nafni kalks, frekar sáu þeir að það voru ekki bara mjólkurvörur, heldur almennt vörur með kalsíum sem höfðu jákvæð áhrif.
Vísindamennirnir komust að þeirri niðurstöðu að 300 mg. kalsíum á dag minnkaði líkurnar á ristilkrabbameini um næstum fimmtung.
Í 250 ml mjólkurglasi eru um 300 mg. kalsíum.
Rannsóknin skoðaði einnig þau matvæli sem voru á hinum enda kvarðans.
Sem dæmi má nefna að aðeins 20 g af áfengi á dag, sem jafngildir stóru vínglasi, jók hættuna á ristilkrabbameini um 15 prósent, en 30 g af rauðu og unnu kjöti jók hættuna á krabbameini í þörmum um 8 prósent.
Vísindamennirnir sem unnu rannsóknina telja að niðurstaðan gefi ástæðu til að rannsaka kalk frekar til að komast að því hvernig steinefnið hefur áhrif á mismunandi þjóðfélagshópa.
