Bandarísku hjartaverndarsamtökin létu skrá þá átta þætti sem helst stuðla að heilbrigðu hjarta- og æðakerfi, svo og langlífi.
Nú hafa bandarískir vísindamenn við háskólann í Maryland í Bandaríkjunum komist að raun um að sömu átta þættir geta einnig haft veruleg og marktæk áhrif allt annars staðar í líkamanum.
Í ljós hefur nefnilega komið að heilinn eldist einnig hægar í þeim sem fara eftir ráðleggingum þessum.
Þetta er niðurstaða nýrrar rannsóknar sem enn hefur einungis verið gefin út sem svonefnt „forprent“ en með því er átt við að ritið hafi ekki verið ritrýnt, líkt og gert er við vísindarit í því skyni að ljá þeim eins konar gæðastimpil.
Með hliðsjón af niðurstöðunum draga vísindamennirnir þá ályktun að heilnæmu venjurnar átta hljóti að hafa áhrif á hvíta efni heilans en um er að ræða þann hluta heilans sem stjórnar námsgetu okkar og minni.
Hvíta efnið býr yfir tengingum heilans
Gráa efni heilans felur í sér kjarna heilafrumnanna en hið hvíta hefur aftur á móti að geyma tengingar heilans, svonefnda taugaþræði sem flytja boð frá einni frumu til annarrar.
Hvíta efnið skreppur að öllu jöfnu saman og breytir um lögun eftir því sem við eldumst. Þessu ferli virðist hins vegar vera unnt að hægja á með réttum lifnaðarháttum.
Þessir átta mikilvægu þættir sem á ensku ganga undir heitinu „Life’s essential 8“, eru:
- Minnst 150 mínútna hæfilega erfið hreyfing á viku
- Minnst sjö stunda svefn á nóttu
- Heilnæm fæða sem felur í sér hnetur, ávexti og grænmeti
- Stöðug líkamsþyngd
- Eðlilegt blóðfitumagn
- Eðlilegt blóðsykurmagn
- Eðlilegur blóðþrýstingur
- Ekkert tóbak
Við höfum rætt við hamingjufræðinginn Bruce Hood um vísindin að baki þessari upplyftandi tilfinningu og sótt til hans mikilvægar ráðleggingar fyrir þá sem óska eftir að lifa hamingjuríkara lífi.
Vísindamennirnir við háskólann í Maryland í Bandaríkjunum studdust við segulómunarmyndir af heilum tæplega 19.000 karla og kvenna á aldrinum 40-69 ára.
Segulómunin var nýtt til að hanna gervigreindarlíkan sem sagt gat fyrir um raunverulegan aldur einstaklinganna með hliðsjón af stærð og lögun hvíta efnis heilans.
Vísindamennirnir gáfu hverjum og einum þátttakanda síðan einkunn á bilinu 0 til 100, allt eftir getu hvers og eins til að lifa samkvæmt heilnæmu venjunum átta.
Þeim mun betur sem þeim tókst að temja sér venjurnar átta, því hærri var einkunnin.
Fyrir hverja 10 stiga hækkun reyndist hvíta efni þátttakandans vera 113 dögum yngra en raunverulegur aldur þess hins sama sagði fyrir um.
Vísindamennirnir vissu fyrir að heilnæmar lífsvenjur tengjast aukinni vitrænni getu og geta stuðlað að stækkun heilans en raunar hafa einungis verið gerðar fremur takmarkaðar rannsóknir á þessu sviði sem sýna fram á afleiðingarnar fyrir hvíta efnið.
