Simpansarnir þurftu að muna tilviljanaröð talna.

Líffræði

Ungir simpansar hafa betra minni en háskólastúdentar. Þetta er niðurstaða vísindamanna við Prímatarannsóknastofnun Kyoto-háskóla.

Þrjár simpansamæður með unga sína tóku þátt í tilrauninni en níu háskólastúdentar voru fulltrúar mannkynsins. Þar eð allir simpansarnir réðu við tölurnar 1 - 9 voru í tilrauninni lagðar fyrir ýmsar þrautir á tölvuskjá og í öllum tilvikum þurfti að muna röð þessara talna. Í einu slíku prófi var tölunum dreift tilviljanakennt um skjáinn. Þegar þátttakendur höfðu ýtt á tölu, hvarf hún bak við hvítan reit á skjánum. Þáttakendur þurftu nú bæði að muna hvar hver tala var og í hvaða röð ýtt hafði verið á þær.

Ungu simpansarnir stóðu sig betur en bæði mæðurnar og stúdentarnir. Hæfni ungu simpansanna skýra vísindamennirnir þannig að þeir hafi „ljósmyndaminni“ og geti því byggt upp mynd af flóknu mynstri.