Þrumugnýr er höggbylgja hljóðs og myndast vegna skyndilegrar og ofboðslegrar hitunar lofts kringum eldinguna.

Ýmsar ástæður eru fyrir því að þrumugnýrinn varir lengur en þær fáu míkrósekúndur sem sjá má eldingarblossann.

M.a. berast hljóðbylgjur frá mörgum stöðum á ferli eldingarinnar milli skýja og jarðar og tímamunurinn veldur þessum sérkennilega gný.

Jafnframt geta hljóðbylgjurnar endurkastast af einhverju sem á vegi þeirra verður og þá heyrir maður stundum sama hljóðið oftar en einu sinni, sem eins konar bergmál.

Sjálf eldingin er afhleðsla rafmagns sem fer eftir fyrirfram ákveðinni braut (þar sem frumeindir í lofti hafa þegar jónast) og jafnar út spennumismun milli jarðar og skýs. Oftast er talað um að eldingunni slái niður, en elding getur líka farið milli efsta og neðsta hluta skýsins eða milli tveggja skýja og þá slær engri eldingu niður.

Annars má nýta þrumuna til að áætla lauslega fjarlægðina frá eldingunni. Hljóðhraði er um 340 m/sek við sjávarmál þannig að ef t.d. líða 3 sekúndur frá því að eldingin sést þar til þruman heyrist, hefur eldingin verið í um 1 km fjarlægð.