Með flugum skal flugur uppræta. Þetta er hugmyndafræðin að baki sérstakri mexíkóskri verksmiðju í bænum Tuxtla Gutiérrez.
Frá árinu 1976 hafa þar klakist út 354 milljarðar amerískra snigilflugna sem liður í tilraun til að uppræta stofn villtra flugna sömu tegundar.
Latneskt heiti flugnanna er Cochliomyia hominivorax og úti í náttúrunni klekjast lirfurnar í opnum sárum lifandi dýra og þaðan liggur svo leið þeirra langt inn í kjöt á dýrinu sem lirfurnar lifa á. Á höfði lirfunnar er að finna tvo oddhvassa króka sem hún notar til að bora sig inn í kjötið.
Þar sem hver fluga verpir 250-500 eggjum í hvert sár geta lirfurnar étið og skemmt svo mikinn vef að hýsillinn er nánast étinn upp til agna innan frá og lætur fyrir vikið lífið á kvalafullan hátt, en þessi hræðilegi dauðdagi þekkist einnig meðal manna.
Ný flugnaverksmiðja opnuð á næsta ári
Ameríska snigilflugan þrífst ekki í svölu loftslagi en áður fyrr var flugan útbreidd um öll Suðurríki Bandaríkjanna, þar sem bæði nautgripum og villtum dýrum stóð ógn af flugunum.
Nýfæddir kálfar fengu oft egg flugunnar í gegnum naflastrenginn og margra þeirra beið kvalafullur dauðdagi. Á sjötta áratug tuttugustu aldar fengu tveir bandarískir skordýrafræðingar hins vegar góða hugmynd.
Fyrst í stað hristu aðrir höfuðið og fáum datt í hug að hugmynd þeirra myndi gagnast í raun en þeir stungu upp á því að hafin yrði flugnarækt þar sem flugurnar yrðu geislaðar áður en þeim síðan yrði sleppt lausum.
Geislunin myndi gera flugurnar ófrjóar og ef engin yrðu afkvæmin myndi flugunum fljótt fækka. Nokkrar tilraunir sem gerðar voru á litlum eyjum leiddu í ljós að hugmyndin var engin firra.
Hugmyndin gagnaðist nefnilega í raun og veru. Flugunum var útrýmt á eynni Curaçao þegar árið 1954 en tilraunirnar leiddu að sama skapi í ljós að það var heilmikið verk að rækta þennan mikla flugnafjölda.
Ljóst var að nú dygðu engin vettlingatök. Gerð var áætlun um hvernig eyða mætti flugunni á hverju svæðinu á fætur öðru og til lengri tíma litið vonast vísindamennirnir til að geta útrýmt Cochliomyia hominivorax með öllu.
Flugnaverksmiðjan gegnir veigamiklu hlutverki í þessari áætlun, því starfsmennirnir 350 hafa náð mikilli leikni í að rækta flugurnar. Þó er vandkvæðum háð að anna allri eftirspurninni með þessari einu verksmiðju og því eru uppi ráðagerðir um að opna nýja flugnaverksmiðju á næsti ári í Panama.
