Minnst 125 manns misstu lífið og 323 slösuðust þegar ofsahræðsla greip um sig meðal áhorfenda á yfirfullum fótboltaleikvangi á eyjunni Jövu í Indónesíu þann 1. október árið 2022.
Þrátt fyrir að þetta mikla mannfall geri þennan indónesíska harmleik að einu versta slysi innan íþrótta á síðari tímum er harmleikurinn ekki nálægt því að vera sá sem hefur krafist flestra mannslífa.
Árið 27 e.Kr. glötuðu minnst 20.000 manns lífinu þegar hringleikhús í hinum forna ítalska bæ Fidenae hrundi þegar mót skylmingaþræla var í fullum gangi.
Þúsundir hafa látist á leikvöngum
Hrun hringleikhússins í Fidenae er ekki eina stórslysið sem hefur dunið á íþróttaáhugafólki. Hér að neðan eru dæmi um þrjú önnur þar sem fjölmargir dóu.
Steinveggir og pallar hrynja
Ár: Um 284-286 e.Kr.
Staður: Circus Maximus, Róm, Ítalíu
Fjöldi látinna: Um 13.000
Hvað gerðist? Þriggja hæða steinveggur sem bar m.a. stóra áhorfendapalla, hrundi allt í einu niður. Í kjölfarið hrundu pallarnir og mörg þúsund manns létu lífið.
Burðarstoðir brotnuðu
Ár: 140 e.Kr.
Staður: Circus Maximus, Róm, Ítalíu
Fjöldi látinna: 1.112
Hvað gerðist? Þegar veðhlaup með hervögnum fór fram þrengdu áhorfendur sér fram á einn af efri áhorfendapöllunum til að sjá betur hlaupið. Burðarstoð brast undan þyngdinni svo pallarnir hrundu niður.
Veðhlaup endar með eldsvoða
Ár: 1918
Staður: Happy Valley, Hong Kong
Fjöldi látinna: 614
Hvað gerðist? Þann 26. febrúar 1918 hrundi áhorfendapallur og velti mörgum nærliggjandi matarbásum um koll. Slysið kveikti í nokkrum bambusmottum og mikill og mannskæður eldur breiddist út.
Áður en bardagarnir hófust voru glaðir og eftirvæntingarfullir áhorfendur búnir að streyma inn í hringleikhúsið og stútfylla það. Sá maður sem var ábyrgur fyrir byggingu leikvangsins – maður að nafni Atilius – hafði í sparnaðarskyni látið smíða hringleikhúsið úr timbri fremur en steinum. Samkvæmt sumum heimildum var auk þess mikið fúskað við byggingu leikvangsins.
Þetta sleifarlag reyndist afdrifaríkt. Pallarnir gátu ekki borið þyngdina af öllum þessum mannfjölda og þegar byggingin hrundi fórust bæði áhorfendur á pöllunum í hringleikhúsinu ásamt fjölmörgum öðrum sem voru að kaupa sér hressingu við söluborð undir stúkunum.
Allt að 50.000 Rómverjar söfnuðust saman til að sjá skylmingaþræla berjast, þegar hringleikhúsið hrundi saman.
Minnst 20.000 létust
Ekki er vitað með vissu hversu mörg fórnarlömbin voru í þessum harmleik. Rómverski sagnaritarinn Svetón áætlar að 20.000 áhorfendur hafi farist, meðan kollegi hans Takítus skrifar að 50.000 manns hafi dáið eða slasast.
Þá er ritað að björgunarstarf hafi tekið drjúgan tíma við að leita að fólki í rústunum, sinna þeim slösuðu og bera kennsl á hina látnu.
Eftir þetta hörmulega slys tók öldungaráðið í Róm þá ákvörðun að einungis stórauðugir menn – sem hefðu efni á því að byggja traustar byggingar – mættu skipuleggja bardaga skylmingaþræla og að öll ný hringleikhús bæri að skoða gaumgæfilega áður en þau fengju leyfi yfirvalda.
