„It’s a great drug!“
Þannig hljóðuðu ummæli fyrrum forsetaframbjóðandans Bobs Dole þegar hann kom fram í bandaríska spjallþættinum Larry King í maí 1998. Dole viðurkenndi í þættinum að hann hefði misst kyngetuna sjö árum áður í kjölfarið á krabbameini í blöðruhálskirtli en væri nú klár í slaginn á nýjan leik eftir að hafa komist í kynni við litla bláa töflu sem kallaðist Viagra.
Dole var ekki einn um að dásama Viagra. Örfáum mánuðum eftir að hann kom fram í sjónvarpsþættinum hafði líf milljóna karla og kvenna breyst svo um munaði þegar bandaríska lyfjaeftirlitið, FDA, veitti leyfi fyrir fyrstu töflunni gegn getuleysi.
Einkaleyfi Pfizer fyrir lyfinu Viagra rann út á árinu 2020 og síðan þá hafa mörg samheitalyf birst á hillum apótekanna.
Ferðalag töflunnar til Bandaríkjanna hófst í breskri rannsóknarstofu á árunum upp úr 1980 þegar vísindamenn við lyfjafyrirtækið Pfizer unnu að því að þróa lyf gegn brjóstverkjum.
„Upphaflega gerðum við tilraunir með að nota síldenafíl, virka efnið í Viagra sem hjartalyf vegna eiginleika þess til að lækka blóðþrýstinginn“, segir Brian Klee, yfirlæknir hjá Pfizer.
„Meðan á tilraunum þessum stóð komumst við á snoðir um að þátttakendurnir neituðu að afhenda okkur umframbirgðir sem þeir höfðu fengið, sökum aukaverkunar lyfsins sem lýsti sér þannig að limurinn varð stinnari og stærri, auk þess sem stinningin stóð lengur yfir en ella“.
MYNDSKEIÐ: Auglýsing fyrir Viagra árið 2000
Pfizer auglýsti kraftaverkapilluna gríðarlega í bandarísku sjónvarpi þegar hún var samþykkt árið 1998.
Gríðarlegar vinsældir
Vísindamennirnir áttuðu sig brátt á því að aukaverkunin hafði breytt hjartalyfinu þeirra í nýtt kraftaverkalyf gegn getuleysi. Lyfinu síldenafíl hafði verið ætlað að víkka út æðarnar og flytja meira blóð til hjartans en raunin varð sú að lyfið orsakaði enn meira blóðflæði til kynfæranna.
Vísindamenn hjá Pfizer breyttu fljótt um stefnu og fengu leyfi fyrir nýja lyfinu hinn 27. mars 1998. Viagra sló strax í gegn og ólögleg sala fór af stað í Evrópu, þar sem leyfi fyrir þessu nýja lyfi fékkst ekki jafn fljótt þar og í Bandaríkjunum.
Salan á Viagra náði hámarki árið 2012 en það ár seldi Pfizer litlu bláu pillurnar sínar fyrir um 2,1 milljarð Bandaríkjadala.
