Kvöld eitt í júlí 2021, þegar Aaron James tæknimaður í háspennuvirki var við vinnu sína, straukst auga hans eitt andartak í háspennuleiðslu.
Þetta óhappatilvik varð þess valdandi að þessi 46 ára Bandaríkjamaður fékk 7.200 volta straum beint í andlitið. Það mátti kalla kraftaverk að hann skyldi lifa af en hann missti hluta andlitsins, vinstra augað og vinstri handlegg.
Nú hafa skurðlæknar hjá Langdon Health-háskólasjúkrahúsinu í New York framkvæmt fyrstu vel heppnuðu augnaígræðsluna á þessum fjölskylduföður.
Augað nýtist honum reyndar ekki enn til að sjá en blóðflæði til ígrædda augans er eðlilegt, þrýstingur réttur og svo virðist sem taugaboð berist eðlilega. Í sömu aðgerð var hluti andlits græddur á Aaron James.
Skurðaðgerðin tók 21 klukkustund og að henni komu fleiri en 140 skurðlæknar, hjúkrunarfræðingar og annað heilbrigðisstarfsfólk.
Gjafaandlit og auga komu frá sama gjafanum og augað var alltaf áfast þeim hluta andlitsins sem notaður var. Nánasta umhverfi augans þurfti því ekki að hagga.
Æðar sem liggja að auganu eru afar fíngerðar og þess vegna er mikið vandaverk að tryggja nægjanlegt blóðstreymi.
Aaron James sést hér fyrir slysið, eftir slysið og eftir 21 tíma aðgerð hans.
Tenging við sjóntaugina er líka mikil áskorun. Læknarnir sprautuðu því nokkuð þroskuðum stofnfrumum í sjóntaugina til að mynda nýjar og heilbrigðar frumur.
Þessi tækni hefur aldrei áður verið reynd á mönnum en hún gæti mögulega veitt James einhverja eða jafnvel fulla sjón á ígrædda auganu þegar stundir líða fram.
„Þótt augað skili ekki sjón ennþá, hefur okkur tekist að brjóta okkur í gegnum hindrun sem margir töldu alveg ófæra,“ segir Eduardo Rodriguez sem stýrir ígræðsluteymi spítalans og stjórnaði aðgerðinni.
Þú getur þakkað tveimur háþróuðum líffærum það að geta lesið þetta. Komdu með í ferðalag djúpt inn í augu þín, þar sem þú getur fræðst um hvernig augasteinar, stafir, keilur og taugabúnt umbreyta ljósi í hárfínar myndir.
Og þessi aðgerð er sögð marka tímamót vegna þess hve flókin hún var.
„Aðgerðin ryður brautina fyrir næstu sjúklinga og markar stórt skref í þá átt að endurnýja sjóntaugina, leiða taugaþræði í henni á rétta staði og sjá jafnframt til þess að taugafrumur hornhimnunnar varðveitist,“ segir Rodriguez.
Andlitságræðslur eru enn afar sjaldgæfar. Innan við 50 slíkar hafa bæst við síðan sú fyrsta var framkvæmd árið 2005.
