Öfgar í lofthita, öflug geislun og algjört hrun fæðuframboðs.
Þetta hljómar ekki beinlínis eins og sölutexti í túristabæklingi en gæti orðið hinn grimmi veruleiki, þegar meginlandsfleka jarðar rekur aftur saman og þeir mynda næsta ofurmeginland – í mjög fjarlægri framtíð.
Þetta er niðurstaða rannsóknar sem vísindamenn hjá Bristolháskóla hafa gert. Þeir notuðu tölvulíkön til að reikna út þær afleiðingar sem sameining alls þurrlendis gæti haft fyrir þau spendýr sem lifa á þurrlendi.
Og samkvæmt niðurstöðunum eru horfurnar ekki bjartar.
Þess er vænst að þetta nýja ofurmeginland myndist nálægt miðbaug eftir um 250 milljón ár og það hefur fengið nafnið Pangea Ultima sem vísar til ofurmeginlandsins Pangeu sem sameinaði allt þurrlendi á þeim tíma sem eðlur ríktu á jörðinni.
Meginlöndin hafa runnið saman í eitt á um 600 milljón ára fresti á síðustu tveimur milljörðum ára og jarðfræðingar nefna þetta ofurmeginlandahringrásina.
Ofurtölva sér fyrir framtíðina
Talið er að ástæðuna sé að finna um miðbik möttuls jarðar, þar sem glóandi heit kvika togar meginlandsflekana til.
Við rannsóknina notuðu vísindamennirnir ofurtölvur og þróuð loftslagslíkön til að sjá hvaða áhrif þessar jarðfræðilegu tilfæringar muni hafa á hitastig, vind, regn og loftraka á nýja ofurmeginlandinu.
Í ljós kom að það verður verulega heitt í veðri hjá þeim landdýrum sem á þeim tíma verða á ferli á þurrlendinu.
Mikill árekstur skapaði Pangeu
Árekstur meginlandsfleka skapaði ofurmeginlandið Pangeu fyrir um 325 milljónum ára.
Fyrir 325 milljón árum: Meginlönd rekur saman
Næstum allt þurrlendi myndar tvö meginlönd, Euroameríku og Gondwana. Þessir tveir meginlandsflekar rekast saman.
Fyrir 235 milljón árum: Pangea
Allt þurrlendi jarðar myndar nú Pangeu – eftir grísku orðunum pan = allt og gaia = jörð. Hafið Panthalassa er eina úthafið.
Fyrir 140 milljón árum: Heimsálfur myndast
Flekana rekur sundur. Norður-Atlantshaf er mjótt sund en Afríka og Suður-Ameríka eru enn sameinaðar.
Svo víðfeðman landmassa mun nefnilega fyrirsjáanlega skorta þau kælingaráhrif sem nálægð við sjóinn hafa nú. Jafnframt gera vísindamennirnir ráð fyrir að sólin sem þá verður orðin nokkru eldri, muni senda frá sér 2,5% meiri geislun en hún gerir nú.
Þetta er þó ekki allt og sumt, því mun meira verður um eldgos sem dæla gríðarlegu magni koltvísýrings út í gufuhvolfið og valda því að umhverfið verður til muna fjandsamlegra og fæðujurtir af skornum skammti.
Myndin sýnir þurrlendi jarðar nú og væntanlegt landslag eftir 250 milljón ár, þegar öll meginlönd verða sameinuð í ofurmeginlandið Pangeu Ultimu.
Vísindamennirnir telja að einungis 8-16% þurrlendisins verði byggileg spendýrum og hitastig geti á stórum svæðum farið upp í 40-70 gráður.
Þetta segja þeir geta orðið dauðadóm yfir langflestum spendýrum sem hafa annars m.a. þróað svitakirtla til að laga sig að hita.
Hæfnin til að losa líkamann við umframhita getur lent í alvarlegri hættu þegar lofthiti verður langtímum saman yfir 40 gráður í lágum loftraka eða 35 gráður í miklum loftraka.
„Mannfólkið – ásamt mörgum öðrum tegundum – verður í útrýmingarhættu vegna skorts á hæfni til að losa hitann með því að svitna og kæla þannig líkamann,“ segir aðalhöfundur niðurstöðuskýrslunnar, Alexander Farnsworth.
Vísindamennirnir undirstrika þó að við megum ekki gera lítið úr núverandi loftslagskrísu í samanburðinum.
„Við sjáum vissulega fyrir okkur óbyggilegan hnött eftir 250 milljón ár en við erum nú þegar að upplifa öfgakenndar hitabylgjur sem eru skaðlegar heilbrigði manna. Það er þess vegna sem það er svo mikilvægt að ná kolefnishlutleysi svo fljótt sem framast er unnt,“ segir Eunice Lo sem einnig tók þátt í rannsókninni.
