Innan tíðar á nýtt tröll að svífa um himinhvelið.
Hjá bandaríska fyrirtækinu Radia stendur til að byggja risavaxna flugvél sem þó er ekki ætlað að lækka miðaverð í farþegaflugi.
Þotan kallast WindRunner og henni er ætlað að flytja vindmylluspaða.
Hjá Radia segja menn flutningavandann einn helsta flöskuhálsinn varðandi byggingu nýrra og stórra vindmyllna á þurru landi.
Enn sem komið er eru lengstu spaðarnir aðeins notaðir í vindmyllum á sjó. Til þeirra er unnt að flytja vængina með skipum. Þessir vængir eru hins vegar of fyrirferðarmiklir til að unnt sé að flytja þá á landi.
Fljúga með vængina nær vindmyllum
WindRunner á að geta flutt allt að 100 metra langa vindmylluspaða.
Nú eru lengstu spaðar sem notaðir eru á vindmyllum á þurrlendi um 70 metrar en með því að nota 100 metra langa spaða getur hver vindmylla framleitt meira rafmagn og þær geta því verið færri en ella.
Samkvæmt Wall Street Journal geta nýjar vindmyllur á landi orðið um 35 prósent arðbærari.
Ætlunin er að WindRunner verði 108 metrar að lengd og flutningsrými nái alla þá vegalengd.
Flugstjórnarklefinn verður ofan á skrokknum og fyrir bragðið verður unnt að opna fraktrýmið framan frá til að koma spöðunum inn á sem auðveldastan hátt.
WindRunner á að fljúga jómfrúarflug sitt innan fjögurra ára og getur flutt allt að 72,5 tonn í einu.
Hjá fyrirtækinu er einfaldlega gert ráð fyrir að einfaldar flugbrautir verði byggðar, annars vegar við verksmiðjuna og hins vegar við fyrirhugaðan vindmyllugarð.
WindRunner á ekki að þurfa nema 1.800 metra langa flugbraut eða um fjórðungi styttri braut en miklu minni farþegaþotur.
Og flugbrautin á ekki einu sinni að þurfa að vera mjög vönduð.
Mörgum hervélum dugar að búið sé að ryðja t.d. stórgrýti og trjágróðri úr vegi til að geta lent og það á líka að gilda um þessa nýju þotu.
Allt þar til í febrúar 2022 var sovéska vélin Antonov An-225 Mriya stærsta flugvél heims, 84 metrar að lengd. Síðasta vélin af þeirri gerð var í eigu Úkraínu og Rússar eyðilögðu hana á fyrstu dögum innrásarinnar í Úkraínu.
Samkvæmt Radia er ætlunin er að WindRunner komist á loft innan fjögurra ára og hún á að geta borið 72,5 tonn og flugþolið er áætlað 2.000 km.
