Öll fæða og allir drykkir sem við látum inn fyrir varir okkar hafa áhrif á heilsufar hjarta- og æðakerfisins.
Nú hafa sænskir lýðheilsufræðingar greint frá því að þessi vinsæli morgundrykkur kunni að auka hættu á hjarta- og æðasjúkdómum í konum.
Mjólk er ómissandi hluti af morgunverði margra og er hún oft nefnd sem viðbót við aðra heilnæma fæðu sökum þess hvað hún inniheldur mikið af kalki og próteinum.
Sýrðar mjólkurafurðir geta varið hjartað
Í nýlegri rannsókn fylgdu vísindamenn eftir 40.000 körlum og 60.000 konum yfir 30 ára tímabil í því skyni að rannsaka samhengið milli mjólkurneyslu og hjarta- og æðasjúkdóma.
Rannsóknin greindi á milli sýrðrar og ósýrðrar mjólkur.
Ósýrð mjólk er sú hefðbundna sem við eigum iðulega í kæliskápnum og sem ekki hefur undirgengist gerjunarferli.
Sýrðar mjólkurafurðir, á borð við skyr og jógúrt, eru viðbættar gerlum eða geri sem breyta bragðinu og gera afurðirnar súrari á bragðið.
Niðurstöðurnar leiddu í ljós að konur sem drekka meira en tvö glös af mjólk á dag, óháð fitumagni, virðast vera í aukinni hættu á að fá hjartaáfall og kransæðastíflu en ella.
Síðargreindi kvillinn gerir vart við sig þegar blóðflæði til hjartans minnkar en um er að ræða einhvern þann alhættulegasta skaðvald sem herjar á mannkynið.
Hættan á hjartasjúkdómum jókst í hlutfalli við magn mjólkurinnar, þ.e. um 5% þegar drukknir voru 400 ml, 12% ef neyslan nam 600 ml og 21% er drukknir voru 800 ml á dag.
Vísindamenn við háskólann í Uppsölum telja að hjarta kvenna geti beðið tjón ef mjólkur er neytt í of miklum mæli. Sýrð mjólk, í líkingu við jógúrt, virðist ekki skaða hjartað, óháð því í hvaða magni hennar er neytt.
Vandamálið sem tengt er óhóflegri mjólkurdrykkju er fólgið í myndun skaðlegra próteina í líkamanum, segir Karl Michaëlsson, prófessor í læknisfræðilegri faraldsfræði við háskólann í Uppsölum, aðalhöfundur rannsóknarinnar.
„Okkur hefur tekist að sýna fram á lítillega aukna hættu á hjartasjúkdómum hjá konum sem drekka meira en tvö glös af mjólk á dag, óháð fitumagni mjólkurinnar. Mikil neysla hefðbundinnar mjólkur tengist próteinmagninu í blóðinu, próteinum sem hafa áhrif á þróun hjarta- og æðasjúkdóma,“ segir Karl Michaëlsson í viðtali við Lifandi vísindi.
Vísindamennirnir fundu engin tengsl milli gerjaðra mjólkurafurða, annars vegar, og hjarta- og æðasjúkdóma, hins vegar.
Mjólkurafurðir, í líkingu við jógúrt, súrmjólk og skyr, hafa vænleg áhrif á hjartað, ef marka má vísindamennina, því allar innihalda þær gerla sem draga úr bólgum.
Milljónir manna taka vítamíntöflur á hverjum degi. En eru þær nauðsynlegar? Lestu hér vítamín:
Vítamín eru líkamanum nauðsynleg eigi hann að starfa rétt. En getum við fengið þau úr töflum frekar en fæðu?
Eins undarlega og það kann að hljóma, fundu vísindamennirnir að baki rannsókninni engin skýr tengsl þegar karlar eiga í hlut.
Þetta segir Michaëlsson reyndar að eigi sér einfalda skýringu.
„Kynjamunur kemur fram í því hvernig líkaminn brýtur niður sykursameindina galaktósa svo úr verður glúkósi. Galaktósa er að finna í mjólkursykri og tilraunir með dýr hafa leitt í ljós að mikil galaktósaneysla getur leitt til frumustreitu og bólgumyndunar, ótímabærrar öldrunar og neikvæðra áhrifa á hjarta- og æðakerfið,“ segir Karl Michaëlsson.
Vísindamennirnir mæla með því að konur vandi val sitt á mjólkurafurðum og hugi að því hversu mikils þær neyta.
Í rannsókninni er þó ekki beinlínis dregin sú ályktun að mjólk geti valdið hjarta- og æðasjúkdómum.
Því er þörf fyrir frekari rannsóknir í framtíðinni til að auka skilning okkar á því hvað veldur, bætir Michaëlsson við.
