Ryð, öflugir straumar og síðast en ekki síst járneyðandi örverur valda því að það er nánast óhugsandi að bjarga flakinu. Niðurbrotið er komið svo langt að skipsskrokkurinn myndi hreinlega molna.
Það hefur vissulega tekist að bjarga skipsflökum í heilu lagi af sjávarbotni. T.d. lét danski uppfinningamaðurinn Karl Krøyer fylla fragtskipið Al-Kuwait með 27 milljón kúlum úr plastefninu polyesteren til að ná því upp árið 1964. En það skip var miklu minna en Títanic og lá tiltölulega grunnt.
Björgun raskar grafarró
Títanic liggur á 3.800 metra dýpi og úr því hefur einungis tekist að bjarga stökum hlutum. Alls hafa 5.500 hlutir verið fluttir upp á yfirborðið, einkum með dvergkafbátum og þrátt fyrir ástand flaksins tókst að hífa upp 20 tonna hluta úr skrokknum árið 1998.
Þessi björgun sætti þó harðri gagnrýni. Fyrirtækið sem að henni stóð, RMS Titanic Inc., var m.a. sakað um fégræðgi á kostnað vísinda og að skaða flakið. Fyrirtækið var líka sakað um að raska grafarró 1.500 fórnarlamba slyssins.
Bakteríur éta Titanic
Árið 2012 voru liðin 100 ár síðan skipið fórst og síðan hefur það verið friðað samkvæmt samþykkt Sameinuðu þjóðanna. En það verður æ minna eftir til að vernda.
Örverur hamast við að brjóta skrokkinn niður og ein tegund þeirra hefur m.a.s. fengið nafn eftir skipinu, bakterían Halomonas titanicae.
Bakterían þrífst í eins konar ryðdropasteinum sem hún skapar sjálf. Þegar vísindamenn uppgötvuðu þessa atorkusömu bakteríu árið 2010, varð fljótlega ljóst að flakið af Títanic á ekki nema fáeina áratugi fyrir höndum. Bakterían er þó talin geta reynst nytsöm og geta komið að gagni við að hraða niðurbroti annarra skipsflaka og gamalla olíuborpalla.
Þegar Titanic sökk nóttina 15. apríl árið 1912 drakk yfirbakari skipsins sig blindfullan af viskíi. Himinhátt alkóhólinnihald bjargaði lífi hans.
Belgir lyfta sokknum skipum
Þótt Títanic verði tæpast bjargað er gerlegt að lyfta sokknum skipum aftur upp á yfirborðið með nægilegum fjölda belgja.
1. Flakið fyllt af belgjum
Sokknum skipum er oft lyft með lofti, oftast í belgjum úr mjög þolinni gúmmíblöndu. Fyrst er belgjunum komið fyrir í flakinu og síðan dælt í þá þrýstilofti af yfirborðinu.
2. Lyft í áföngum
Sé flakið á grunnsævi er því strax lyft alla leið. Sé það á meira dýpi er því lyft í áföngum. Eftir hvern áfanga er það dregið inn á grynnra vatn.
3. Ferðin endar í þurrkví
Þegar flakið er komið upp er það dregið til lands og sett í þurrkví sem hægt er að dæla sjónum úr. Eftir það geta sérfræðingar skoðað skipið, t.d. til að sjá hvað olli slysinu.
