Árið 1827 keypti bandaríski stjórnmálamaðurinn Andrew Jackson páfagauk handa eiginkonu sinni frú Rachel Johnson. Jackson var alræmdur fyrir að blóta hátt og mikið og Poll, eins og páfagaukurinn var kallaður, lærði fljótlega að herma eftir honum.
Andrew Jackson sigraði í forsetakosningunum 1828 og varð forseti árið eftir en sama ár missti hann eiginkonu sína Rachel sem lést úr hjartaáfalli. Jackson hafði Poll á sveitabýli sínu, The Hermitage í Tennessee þar til hann lést árið 1845.
Þegar jarða átti Jackson við hlið eiginkonu sinnar í garði sveitabýlisins þurfti að gera hlé á athöfninni þegar flaumur safaríkra og háværra blótsyrða glumdi út í garðinn frá húsinu.
Þjóðhetjan laðaði að sér fjöldann
Fyrir marga Bandaríkjamenn var Andrew Jackson þjóðhetja. Í ensk-ameríska stríðinu hafði Jackson þjónað sem hershöfðingi og sigraði Breta í New Orleans árið 1815. Síðar snéri hann sér að stjórnmálum og gegndi embætti forseta í átta ár.
Að minnsta kosti 3.000 manns voru viðstaddir þann 10. júní 1845, þegar Jackson var lagður til hinstu hvílu í fjölskyldugrafreitnum. Athöfnin var hins vegar trufluð af blótsyrðaflaumi Polls.
„Þegar mannfjöldinn safnaðist saman byrjaði páfagaukurinn að blóta svo hátt og lengi að það var truflandi svo það þurfti að fjarlægja hann úr húsinu,“ skrifaði séra William Menefee Norment, einn útfarargestanna seinna í bréfi.
Kornabörn sem búa á heimili þar sem er minnst eitt gæludýr eru langtum betur vernduð gegn offitu og ofnæmi síðar á lífsleiðinni en önnur börn.
Það var ekki fyrr en Poll var kominn nógu langt í burt til að ekki heyrðist í honum sem athöfnin gat haldið áfram.
Páfagaukur Andrew Jackson var af tegundinni grár Jaco. Þeir geta lifað í allt að 75 ár og þó svo Poll sé getið af afkomendum Jacksons er óljóst nákvæmlega hversu lengi hann lifði eftir eiganda sinn. Grár Jaco hefur engin raddbönd en líkir eftir orðum og hljóðum með því að blása lofti í gegnum nösina efst á goggnum.
