Aldrei framar matareitrun, ekkert kvef, engir banvænir sjúkdómsfaraldrar. Tilveran án örvera getur við fyrstu sýn haft sinn sjarma. Sannleikurinn er hins vegar sá að þetta yrðu endalokin.

Örverur eru alls staðar – í jarðvegi, höfum, lofti, dýrum og plöntum og meira að segja þrífast sumar við mjög öfgakenndar aðstæður, t.d. í heimskautafrosti eða glóðheitum eyðimörkum. Í heildarlífmassa allra dýra á hnettinum eru um 2 gígatonn af kolefni en í lífmassa allra örvera eru 70 gígatonn af kolefni.

Án örveranna yrði heimurinn fljótur að breytast. Dýr og plöntur stæðu frammi fyrir mjög erfiðum vandamálum.

Allt mun hrynja

Örverur gegna nefnilega lykilhlutverki varðandi hringrás lífsnauðsynlegra efna í lífríkinu, svo sem kolefnis, köfnunarefnis og súrefnis.

Örverur umbreyta t.d. koltvísýringi úr gufuhvolfinu í lífmassa sem dýr og plöntur nota til næringar.

Köfnunarefni hefur líka afgerandi þýðingu fyrir vöxt plantna. Plönturnar geta þó ekki nýtt köfnunarefnið beint úr andrúmsloftinu, heldur fer það í gegnum eins konar forvinnslu örvera áður en plönturnar nýta það í prótín, DNA og blaðgrænu.

Þessu til viðbótar fá allt að 90% allra þurrlendisjurta stóran hluta næringar sinnar og vatns fyrir tilverknað smásærra sveppa í rótakerfinu. Án örvera hryndi lífríkið á örskömmum tíma.

En það er engin ástæða til að örvænta. Örverurnar hafa verið til staðar frá upphafi lífsins fyrir um 3,8 milljörðum ára og lifað af allar hamfarir sem leitt hafa til fjöldadauða tegunda. Þær eru því sennilega alls ekkert á förum.