Andefni er hugtak sem notað er um efni sem byggir á eindum sem eru andstæður eindanna í venjulegu efni. Í venjulegu vetni er jákvætt hlaðin róteind í kjarnanum en um hana hverfist neikvætt hlaðin rafeind. Í andvetni er róteindin neikvætt hlaðin en rafeindin hefur jákvæða hleðslu.
Tilvist andefnis er eðlileg afleiðing lögmála eðlisfræðinnar. Massa má breyta í orku samkvæmt hinni frægu jöfnu Einsteins E = mc2 en jafnan gildir í báðar áttir. Það er því líka hægt að breyta orku í massa. Þegar það gerist myndast alltaf jafn mikið af báðum efnisgerðunum, efni og andefni.
Þetta hefur fengist staðfest í mörgum tilraunum, ekki síst í evrópsku öreindarannsóknastofnuninni CERN í Sviss. Andefni hefur verið mönnum mikil ráðgáta sem enn er óleyst, sem sé spurningin um það hvers vegna alheimurinn er yfirleitt til.
Í Miklahvelli hófst tilvera alheimsins sem í upphafi var hrein orka en umbreyttist smám saman í efni og andefni. En ef myndast hefði nákvæmlega jafnmikið af efni og andefni, hefði alheimurinn aldrei náð að þenjast út vegna þess að efni og andefni hefði þá mæst í sífellu og umbreyst aftur í orku.
Í upphafi hlýtur því að hafa myndast örlítið meira af efni en andefni. Eðlisfræðingar telja að á móti hverjum milljarði af andefniseindum hafi myndast einn milljarður og ein eind af venjulegu efni.
LESTU EINNIG
