Skömmu eftir miðnætti 30. júlí árið 1945 rauf hávær hvellur hljóðláta nóttina úti á Kyrrahafi.
Tveimur dögum áður hafði bandaríska herskipið USS Indianapolis siglt úr höfn í Guam með stefnu á Filippseyjar þar sem áhöfninni var ætlað að undirbúa sig fyrir innrásina á Japan.
Kl. 00.15 hinn 30. júlí hæfðu tvö tundurskeyti sem skotið var frá japönskum kafbáti, bandaríska skipið Indianapolis með þeim afleiðingum að eldur komst í eldsneyti skipsins, svo og vopnabirgðir þess.
Einungis tólf mínútum síðar hafði skipið brotnað í tvennt og sokkið til botns. Um 900 af alls 1.200 áhafnarmeðlimum komust lífs af úr skipinu og reyndu að bjarga sér úti í myrku og djúpu hafinu.
Þegar sólin kom upp næsta morgun blasti við hryllileg sýn þar sem brot úr skipsflakinu flutu í öldunum innan um lík sjómannanna.
MYNDBAND: Eftirlifandi sjómaður talar um hákarlaárásina
Þeir sem komust lífs af börðust um plássið í þeim fáu björgunarbátum sem voru til taks en komust brátt að raun um að miskunnarlaus sólin, svo og skortur á fæðu og vatni, gerðu það að verkum að líkurnar á að komast lífs af voru af skornum skammti.
Til að bæta gráu ofan á svart komu brátt í ljós glorsoltnir hákarlar en blóðlyktin hafði komið þeim á spor mannanna í sjónum.
Hákarlarnir byrjuðu strax að gæða sér á líkunum í sjónum og tóku því næst til við að ráðast á þá sem höfðu komist lífs af.
„Það voru hákarlar alls staðar, mörg hundruð dýr … Þegar svo allt varð kyrrt heyrum við skyndilega öskur og þá vissum við að hákarl hafði gómað einn okkar“, sagði sjómaðurinn Woody James síðar meir.
Nýir útreikningar sýna hvernig hinn tröllvaxni forsögulegi hákarl hefur sennilegast litið út. Hann virðist hafa verið hraðsynt rándýr og mögulega líka hrææta.
James og hinir sjómennirnir reyndu örvæntingarfullir að halda lífi svo dögum skipti, allt þar til áhöfn bandarískrar flugvélar kom auga á þá í öldunum á fjórða degi eftir skipbrotið.
Þann dag komu að fleiri flugvélar, svo og skip, með þeim afleiðingum að þá tókst að bjarga alls 316 af þeim 1.200 áhafnarmeðlimum sem upphaflega höfðu verið um borð.
Ekki er vitað hversu marga sjómenn hákarlarnir átu en talið er að allt að 150 sjómenn hafi orðið fórnarlömb þessarar verstu hákarlaárásar sem vitað er um.
