Líkamleg snerting föðurs og nýfædds barns er gríðarlega mikilvæg hvort sem það er koss eða að strjúka kinn barnsins.

Það er nálægðin sem skiptir máli.

Nálægðin byggir upp sterk tengsl við barnið og veitir öryggi en eins getur snerting reynst einstaklega góð heilsufarlega séð.

Líkamssnerting getur nefnilega verið afgerandi fyrir framtíðarheilbrigði og ónæmiskerfi barnsins þíns.

Styrkir örveruflóru barnsins

Mælanlegt gildi þessarar líkamlegu snertingar kemur fram þar sem fáir myndu ímynda sér – nefnilega í þarmakerfi barnsins. Um það bil 80 prósent af ónæmiskerfi einstaklingsins er tengt þörmum og í ljós kemur að þarmabakteríur föður eru fluttar til barnsins með náinni snertingu og skilar sér í þarma barnsins.

Örveruflóran samanstendur af milljörðum baktería, veira og annarra örvera sem lifa í og ​​á líkamanum og gegna lykilhlutverki í daglegri heilsu okkar. Til dæmis hjálpar örveruflóran við að stjórna ónæmiskerfinu, meltingu, heilastarfsemi og efnaskiptum.

Lengi hefur verið vitað að móðirin flytur bakteríur til barnsins. Það gerist í tengslum við fæðingu um leggöng sem og brjóstagjöf og það er mikilvægt fyrir barnið að fá þessar bakteríum frá móður þar sem þær hafa áhrif á bakteríusamsetningu í þarmakerfi barnsins.

Lítið en mikilvægt framlag

Samkvæmt rannsókn sem birt var í vísindatímaritinu Cell Host & Microbe leggur faðirinn einnig til lítið en mikilvægt framlag með þarmabakteríunum sínum sem flytjast til barnsins.

„Í rannsókn okkar skoðuðum við ekki nánar hvernig bakteríurnar flytjast yfir. Snerting við húð kemur til greina, en það getur líka verið húð við munn, til dæmis þegar faðirinn gefur barninu pela, sem er mjög algengt,“ útskýrir Willem de Vos. Hann er prófessor við Wageningen háskólann í Hollandi og stýrði rannsókninni.

Svarið lá í hægðasýnunum

Í hópnum voru vísindamenn frá Hollandi, Spáni, Ítalíu og Finnlandi og greindu þeir þarmabakteríur í hægðum 73 ungbarna, 21 þeirra fæddust með keisaraskurði og 52 fæddust um leggöng.

Sýnin voru tekin af börnunum þegar þau voru þriggja vikna, þriggja mánaða og eins árs gömul. Þessi sýni voru borin saman við samsvarandi hægðasýni frá mæðrum og feðrum til að sjá hvaða bakteríur voru til staðar.

Rannsakendur gátu séð að feðurnir voru stöðug uppspretta mismunandi tegunda baktería. Eftir eitt ár voru heildaráhrif bakteríuflutnings feðra í samræmi við bakteríuflutning frá mæðrum. Niðurstaða vísindamannanna var að flutningur þarmabaktería frá feðrum bæti að hluta til bakteríuflutning frá mæðrum og sé mikilvægt framlag.

Músatilraunir benda í sömu átt

Fyrri tilraunir með mýs benda í sömu átt. Rannsókn sem birt var í tímaritinu Nature sýndi fram á að þegar dregið er úr fjölbreytileika og magni þarmabaktería í karlkyns músum eykur það í raun hættuna á t.a.m. lægri fæðingarþyngd, vaxtarskerðingu og hættu á snemmbúnum dauðdaga hjá afkvæmum þeirra.

Í þessari rannsókn gáfu vísindamenn frá European Molecular Biology Laboratory í Róm 28 karlkyns músum sýklalyf. Þessi meðferð dregur úr magni þarmabaktería allt að tífalt og breytir um leið mikilvægu jafnvægi milli mismunandi örvera.

Þessi athugun gefur vísbendingu um að þarmaflóra föðurins geti haft áhrif á heilsu næstu kynslóðar.

Margar rannsóknir hafa verið gerðar sem sýna skýr tengsl móður og barns þegar kemur að flutningi örvera. En minna er vitað þegar kemur að föðurhlutverkinu.