Í fyrsta sinn hafa vísindamenn reiknað út stærð og þyngd stærsta hákarls sem nokkru sinni hefur lifað í höfunum.
Um allan hnöttinn hafa fundist tennur úr megalodon sem réð ríkjum í heimshöfunum í 20 milljón ár þar til hann dó út fyrir um 3 milljónum ára. En hvernig hann leit út er hins vegar óvíst. Háfar eru brjóskfiskar og beinagrindin tærist því auðveldlega. Vísindamenn hafa því ekki annað að byggja á en tennurnar.
Samanburður við tennur núlifandi háfa bendir til að megalodon hafi verið 12-20 metra langur og hann er oft sýndur sem ofvaxin útgáfa af hvítháfi. Nú teikna vísindamenn hjá Bristolháskóla í Englandi upp talsvert nákvæmari mynd af þessum risaháf.
16 metra ógnvaldur
Á grundvelli líkmsbyggingar 5 núlifandi háfa hafa vísindamenn teiknað upp mynd af hinum útdauða megalodon.
1. Bakugginn veitti stöðugleika
Smávaxinn og bogadreginn bakuggi veitti stöðugleika bæði á stuttum spretti og lengri vegalengdum.
2. Breiður haus gaf kröftugt bit
Stórar tennur eru til vitnis um að megalodon hafði öfluga kjálka og þess vegna líka kröftuga kjálkavöðva. Það hefur skapað honum þéttvaxnari og breiðari haus en t.d. hvítháfnum.
3. Hár sporður gaf drifkraft
Eins og hjá öðrum háfum var efri sporðblaðkan stærri en sú neðri. Þessi lögun er dæmigerð fyrir fiska sem aðeins nota sporðinn til að spyrna sér áfram.
Í stað þess að miða einvörðungu við hvítháfinn mældu þeir fjölmarga líkamshluta núlifandi háfategunda. Á þessum grundvelli reiknuðu þeir út hvernig líklegast væri að 16 metra langur háfur liti út en það er tvöföld lengd hvítháfs.
Bakaugginn á stærð við manneskju
Niðurstöðurnar sýndu að höfuð þessa forsögulega háfs hefur verið 4,65 metrar að lengd, bakugginn 1,62 metrar að hæð og sporðurinn 3,85 metrar. Mælt frá toppi bakuggans hafa verið 4,53 metrar niður fyrir kviðinn.
Megalodon dó út fyrir um 3 milljónum ára og hefur aðeins skilið eftir sig tennur. Þær eru allt að 18 sm langar, meira en þreföld lengd tanna hvítháfs.
Vísindamennirnir gera ráð fyrir að eins og aðrir stórir háfar hafi megalodon verið með fremur lítinn, bogadreginn bakugga.
Hausinn hefur aftur á móti verið breiður vegna mjög öflugra bitvöðva. Að öllu samantöldu hefur líkamsbyggingin hentað vel til snöggra árása sem krefst mikillar hraðaaukningar en háfurinn hefur líka verið vel fær um að synda langar vegalengdir á jafnari hraða. Þannig hefur hann verið fær um að leita bráðar á stóru svæði og grípa í hræ á hafsbotni við og við.
