Reyklaus lífstíll, nægur svefn og hreyfðu þig í það minnsta 30 mínútur á dag.
Við þekkjum öll hin klassísku ráð við að halda sjúkdómum og slæmu formi í skefjum og lifa góðu lífi – lengi.
Og þó að smá hreyfing í daglegu lífi sé betri en engin, þá er samt ein tegund hreyfingar sem virðist vera sérlega mikilvæg ef þú vilt forðast að deyja fyrir aldur fram.
Tæplega 21 milljón manns
Það er að minnsta kosti niðurstaða nýrrar stórrar metarannsóknar þar sem vísindamenn frá háskólanum í Suður-Ástralíu hafa safnað saman niðurstöðum úr alls 199 mismunandi rannsóknum sem gerðar voru á tæplega 21 milljón fullorðinna.
Helsta niðurstaða þessarar rannsóknar var að líkast til er hægt að draga úr hættunni á að deyja fyrir aldur fram um allt að 17 prósent með því að stunda reglulega þrekþjálfun og þar með styrkja hjarta- og öndunarkerfið.
Ávinningurinn virtist jafnvel vera sérstaklega mikill þegar horft er til hjartasjúkdóma þar sem áhættan minnkaði um allt að 18 prósent.
Skýr skilaboð
Þrekþjálfun reynir á hjarta og lungu þannig að geta líkamans til að taka upp súrefni eykst og hjartað á auðveldara með að dæla blóði um líkamann.
Og þessi tiltekna tegund þjálfunar getur skipt sköpum við að tryggja góða heilsu og langlífi.
Þetta segir prófessor Grant Tomkinson, sem er aðalhöfundur rannsóknarinnar.
“Skilaboðin eru frekar einföld: Ef þú stundar góðar þrekæfingar minnkar hættan á að deyja fyrir aldur fram og fá sjúkdóma í framtíðinni. Það bitnar á heilsu þinni ef þú forðast hreyfingu, segir hann í fréttatilkynningu.
Reglulegar gönguferðir halda heilanum ungum og hjálpa jafnvel til við að laga skemmdar frumur. Þetta kemur fram í nýlegri rannsókn og getur skipt sköpum í baráttunni gegn vitglöpum og Alzheimer.
Prófessorinn nefnir t.a.m. hlaup, hjólreiðar og sund sem gott dæmi um þrekþjálfun.
Og þeir sem ekki eru mikið fyrir að hreyfa sig dags daglega get líka hafist handa.
Þetta kemur fram hjá einum höfunda rannsóknarinnar, Justin Lang, í fréttatilkynningu.
,,Það getur skipt sköpum ef fólk byrjar á hóflegri hreyfingu eins og t.d. hraðri göngu í það minnsta 150 mínútur í hverri viku. Og eftir því sem þolið eykst er síður hætta á sjúkdómum eða snemmbúnum dauðdaga”.
Rannsóknin birtist í British Journal of Sports Medicine.
