Hiksti stafar af samdrætti í þindinni
Hiksti stafar af því að þindin dregst saman í krampakenndum rykkjum. Þindin sem tengd er lungunum, gagnast okkur þegar við drögum andann.
Þegar þindin dregst saman þrýstist loft inn í lungun og við öndum að okkur. Að sama skapi gagnast slök þind þegar við öndum frá okkur.
Raddopið orsakar hikstahljóð
Eðlilegur andardráttur á sér með öðrum orðum stað þegar þindin dregst saman og slaknar á víxl. Í stöku tilvikum sem læknar kunna enn enga skýringu á, dregst þindin skyndilega saman í krampakenndum rykkjum sem kallast hiksti.
Strax eftir slíkan samdrátt lokast svonefnt raddop í barkakýlinu og leysir úr læðingi dæmigerð hikstahljóð.
Að því loknu verður andardrátturinn aftur eðlilegur og það sama gildir um hreyfingar þindarinnar, allt fram að næsta hiksta.
Hiksti getur staðið yfir í áraraðir
Að öllu jöfnu hikstum við sex til sextíu sinnum á mínútu. Í langflestum tilvikum hættir hikstinn af sjálfsdáðum en þó eru til dæmi um fólk sem hélt áfram að hiksta svo árum skipti.
Læknar kunna engin ráð við því hvernig losna megi við hiksta. Hins vegar er ógrynni slíkra ráða að finna meðal leikmanna.
Meðal hefðbundinna ráða er m.a. að halda í sér andanum, drekka vatn á meðan staðið er á haus eða að borða fulla skeið af sykri. Hvaða ráð gerir gagn er svo breytilegt frá einum til annars.
