Áttu auðvelt með að setja þig í spor annarra?
Þá eru góðar líkur á að þú áttir þig líka á hvað dýr eru að reyna að koma á framfæri.
Ný dansk-svissnesk rannsókn sem birt var í Royal Society Open Science bendir til þess að fólk með mikla samkennd eigi einnig auðvelt með að átta sig á hvað felst í dýrahljóðum.
Ef þú vinnur líka með dýrum – og ert á aldrinum 20-29 ára áttu enn auðveldara með að lesa í atferli dýra, segja rannsakendur.
„Niðurstöður okkar sýna að manneskja getur ákvarðað út frá dýrahljóðum hvort dýr sé spennt eða ekki, og hvort dýrið sé að tjá jákvæðar eða neikvæðar tilfinningar,“ segir atferlislíffræðingur Elodie Briefer frá líffræðideild Kaupmannahafnarháskóla sem vann við rannsóknina.
„Þetta á við um fjölda mismunandi spendýra. Við tókum líka eftir að hæfnin til að túlka hljóðin er háð nokkrum þáttum eins og aldri, nánum kynnum við dýr og ekki síst hversu mikla samkennd við höfum gagnvart öðrum manneskjum“ heldur hún áfram.
Hverjir stóðu sig best í prófinu?
Fólk sem vinnur með dýrum: Rannsakendur sáu afgerandi mun í hópi þeirra sem umgangast dýr í tengslum við vinnu sína – og það á einnig við um önnur dýr en þau sem þau umgengust mest.
20-29 ára: Niðurstöðurnar sýna greinilegan mun. Fólk undir tvítugu gengur verst, 20-29 ára eru bestir í prófinu og eftir það minnkar hæfileikinn til að afkóða dýrahljóð hægt og rólega með aldrinum.
Fólk með mikla samkennd: Rannsakendur voru mest hissa á því að þeir sem náðu góðum árangri á samkenndarprófi áttu einnig mun auðveldara með að skilja hljóð dýranna.
Tilfinningauppnám mælt
Könnunin byggði á svörum frá 1024 einstaklingum frá 48 mismunandi löndum.
Þeir hlustuðu á hljóð sex spendýra, geita, nautgripa, asískra villihesta, tamdra hesta, svína og villisvína.
Hljóð dýranna sex voru spiluð fyrir þátttakendur rannsóknarinnar ásamt óskiljanlegum hljóðum frá mennskum leikurum.
Þátttakendur þurftu síðan að giska á hvort hljóðin væru tjáning mikils eða lítils tilfinningauppnáms og hvort tilfinningin væri jákvæð eða neikvæð.
Eftir prófið voru þátttakendur beðnir um að svara prófi sem mældi samkennd þeirra gagnvart öðru fólki.
„Þetta er viðurkennt próf, en það mælir bara samkennd til annara manneskja,“ útskýrir Elodie Briefer.
„Engu að síður sáum við skýr tengsl við hæfileikann til að skilja og túlka dýrahljóð.“
