Dómsdagsflugvél er flugvél sem bæði Bandaríkjamenn og Rússar þróuðu upp úr 1970 til að búa sig undir gjöreyðileggingu í kjarnorkustríði í kalda stríðinu.
Flugvélarnar áttu að virka sem eins konar fljúgandi birgi þar sem leiðtogar þjóða og ráðherrar væru fluttir í öryggi ef ráðist væri á land þeirra með kjarnorkuvopnum. Úr lofti gátu fyrirmenn landsins ráðfært sig við ráðgjafa og ákveðið næstu skref í stríðinu.
Til að tryggja flugvélarnar sem best voru þær búnar fjölmörgum vörnum. Flugvélarnar voru t.d. smíðaðar til að þola rafsegulbylgjuhögg eftir sprengingu kjarnorkuvopna sem yfirleitt eyðileggja allan rafbúnað. Auk þess voru flugvélarnar búnar með hliðrænum flugbúnaði til að tryggja þær gegn tölvuárásum.
Dómsdagsflugvélin Boeing E-4B getur tekið 112 manns ef kjarnorkustyrjöld brýst út.
Flugvélarnar eru alltaf tilbúnar
Fjöldi rússneskra dómsdagsflugvéla er óþekktur en BNA býr núna yfir fjórum slíkum. Þær eru tæknilega séð ekki leynilegar en yfirvöld fjalla sjaldan um þær – hvað þá heldur staðsetningu þeirra sem er tryggilega haldið leyndri.
Engu að síður er vitað að minnst ein dómsdagsflugvél er ævinlega tilbúin á hvaða tíma sólarhringsins til að taka á loft með forsetann og fylgdarlið hans, verði BNA fyrir árás. Flugvélarnar tóku á loft þann 11. september 2001 þegar ráðist var á tvíburaturnana í New York.
Síðast sást til bandarískrar dómsdagsflugvélar, Boeing 747 E-4B yfir Ermarsundi í lok mars 2022. Flugvélin var mögulega á lofti sem eitt viðbragð við því að Rússland hafði hótað að nota kjarnorkuvopn ef Vesturlönd blanda sér í innrás þeirra í Úkraínu.
