Bresk-indverski rithöfundurinn Salman Rushdie var rétt stiginn upp á svið í menningarmiðstöð í New York þegar ungur svartklæddur maður stökk upp úr áhorfendahópnum og hljóp upp á svið.
Fáeinum sekúndum síðar stóð þessi svartklæddi maður á bak við Rushdie og stakk hann hvað eftir annað bæði í háls og maga. Samkvæmt sjónvarvottum var rithöfundurinn stunginn 10 – 15 sinnum áður en áhorfendum tókst að yfirbuga ódæðismanninn.
Síðar þennan dag greindi umboðsmaður Rushdie frá því að rithöfundurinn hefði skaddast á lifur, öðrum handlegg og öðru auganu. Engu að síður var Rushdie á lífi og hann hafi þannig náð að sleppa undan dauðadómi sem var gefinn út gegn honum fyrir meira en 30 árum.
Í áratugi hefur Salman Rushdie óttast trúarlegan dauðadóm frá 1989.
Í felum í áratugi
Þegar Rushdie fæddist á Indlandi árið 1947 var ekkert sem benti til þess að hann myndi enda sem einn umdeildasti rithöfundur heims. Hann fæddist inn í velmegandi múslimska en veraldlega sinnaða fjölskyldu og 13 ára gamall var hann sendur í heimavistarskóla í Englandi, þar sem hann síðar lagði stund á sagnfræði.
Hann vakti athygli í Bretlandi 1981 þegar metsölubók hans „Miðnæturbörn“ var gefin út. Það var þó fyrst með „Söngvum Satans“ frá 1988 sem Rushdie var talinn einn af fremstu rithöfundum heims.
Jafnframt gerði bókin Rushdie að skotmarki meðal nokkurra heittrúaðra landa, enda sögðu þeir hluta bókarinnar vera argasta guðlast. Bókin var því bönnuð í mörgum löndum og árið 1989 kvað klerkastjórn Írans upp svokallað fatwa, þar sem Rushdie var fordæmdur fyrir guðlast og voru sanntrúaðir múslimar hvattir til að drepa hann.
Í áratugi var Rushdie í felum meðan margar persónur sem tengdust „Söngvum Satans“ – meðal annars þýðendur – lentu í því að reynt var að drepa þá.
Á síðari árum hafði Rushdie þótt slaka á öryggiskröfum sínum og tók þátt í samkomum án öryggisvarða. Það var einmitt á einni slíkri samkomu sem ráðist var á hann og hann stunginn.
