Almennt drögum við andann á um 4 sekúndna fresti, en þjálfaðir sportkafarar geta haldið niðri í sér andanum í meira en 10 mínútur og sleppa þannig úr svo sem 150 andardráttum.
Þetta gerir miklar kröfur til líkamans, sem ekki þarf aðeins að láta sér nægja afar lítið súrefni, heldur þarf líka að standast það mjólkursýruálag sem vöðvarnir verða fyrir, meðan þeir starfa án súrefnis.
Án súrefnis í langan tíma
1. Æðar í útlimum og öðrum síður lífsnauðsynlegum líkamshlutum draga sig saman og eyða minna súrefni. Þess í stað leitar blóðið í mikilvægustu líffærin í búknum.
2. Miltað dregur sig saman og dælir uppsöfnuðum rauðum blóðkornum út í blóðið til að unnt sé að flytja meira súrefni.
3. Lungnasekkir fyllast af blóðplasma til að koma í veg fyrir að lungun falli saman við háan þrýsting.
4. Hjartslátturinn hægist, blóðið streymir hægar og frumurnar eiga erfiðara með að taka til sín hið dýrmæta súrefni.
Andlegur styrkur þarf líka að standast mikið álag, því kafarinn verður að halda drukknunaróttanum í skefjum. Nái kafarinni ekki að halda sér slökum örva streituhormón hjartsláttinn og þá eyðist súrefnið hratt.
Auk bæði líkamlegrar og andlegrar þjálfunar æfa kafarar sérstaka öndunatækni til að geta bæði haldið niðri í sér andanum og verið næstum án súrefnis.
Náttúruleg viðbrögð spara súrefni
Náttúruleg köfunarviðbrögð samræma alveg sjálfvirkt ýmsa líkamsstarfsemi þannig að kafarinn getur verið lengur í kafi án þess að draga andann. Með þjálfun má styrkja köfunarviðbrögðin og þannig halda lengur niðri í sér andanum.
Meðal æfinganna má nefna að halda niðri í sér andanum í kyrrstöðu í eina mínútu og ganga síðan af stað og fara eins langt og hann kemst án þess að draga andann.
Næst er andinn dreginn djúpt og beðið þar til öndun er orðin eðlileg áður en æfingin er endurtekin fáeinum mínútum síðar.
Rétt fyrir keppni gera kafarar ákveðnar æfingar til að hægja á efnaskiptum líkamans, andardrætti og koltvísýringi í blóði. Í þessum æfingum felst m.a. að halda niðri í sér andanum, anda djúpt og anda mjög hratt til skiptis. Þetta undirbýr líkamann fyrir súrefnisleysi.
Metabók kafaranna
Sportkafarar keppa í ýmsum greinum með og án ákveðinna hjálpartækja.
11 mínútur og 35 sekúndur
Lengsta köfun í hvíldarstellingu.
Methafi: Stéfane Mifsud, Frakklandi.
24 mínútur og 37 sekúndur.
Budimir Šobat, Króatíu (andaði að sér hreinu súrefni áður)
281 metri
Lengsta kafsund með sundblöðkur.
Methafi: Goran Colak, Króatíu.
126 metrar
Dýpsta köfuna án lóða en með sundblöðkur.
Methafi: Aleksej Mortjanov, Rússlandi.
214 metrar:
Dýpsta köfun með lóð og blöðrur.
Methafi: Herbert Nitsch, Austurríki.
