Kettir mala til að eiga samskipti, hvort heldur við okkur mennina eða aðra ketti. Kunnuglegustu aðstæðurnar eru þær þegar ketti er klórað á stað sem honum finnst gott að láta klóra sér á.
Kettir mala einnig þegar aðrir kettir sleikja þá í því skyni að þvo þeim. Þá mala þeir einnig oft þegar þeim er gefið að éta, sennilega er um að ræða leifar frá fyrstu ævidögum kattarins þegar læðan finnur kettlingana sína með hliðsjón af hljóðinu sem heyrist þegar þeir mala og leyfir þeim að komast á spena.
Við allar þessar aðstæður eru skilaboðin þau sömu: Haltu áfram að gera það sem þú ert að gera!
Malið á rætur að rekja til barkans
Kettir mala þegar vöðvar í barkakýlinu, áþekkir raddböndunum okkar, herpast saman og svo slaknar á þeim aftur, þannig að þau sveiflast hratt.
Þegar kötturinn dregur andann berst loftið fram hjá titrandi vöðvunum. Titringurinn veldur sveiflum á loftinu og leiðir af sér hljóðbylgjur sem við þekkjum sem kunnuglegt mal í köttum.
Kettir eru ekki einir um að mala
Kettir mala af völdum titrandi vöðva í barkanum en kettir eru ekki einu dýrin sem mala.
Vöðvar hefta loftið
Vöðvar í barka kattarins dragast hratt saman og þannig myndast hljóðið sem við þekkjum sem mal. Kettir mala einkum til að gefa til kynna að þeim líði vel.
Afkvæmi genettu mala til að vekja á sér athygli
Genetta minnir á kött en í raun réttri er um að ræða svokallað desdýr og fyrir vikið er dýrið ekki kattartegund. Afkvæmi dýrsins mala fyrstu vikuna til þess að vekja athygli móðurinnar á sér.
Matar(gleði) leysir úr læðingi mal
Górillur, einkum fullorðin karldýr, gefa frá sér hljóð sem líkist mali þegar þær éta. Dýrin gefa þessi tilteknu hljóð oft frá sér en þó einkum þegar á matseðlinum er góðgæti á borð við blóm og fræ.
Kettir mala ekki aðeins þegar þeim líður vel heldur einnig við allt aðrar aðstæður, svo sem eins og þegar þeir verða kvíðnir, hræddir, haldnir streitu eða þegar hundar elta þá.
Ein kenningin er sú að mal hafi róandi áhrif á ketti.
Mal kann að lækna
Árið 2001 ákvað dýrahljóðasérfræðingurinn Elizabeth von Muggenthaler að rannsaka hvort kettir gætu læknað sjálfa sig með því að mala, eftir að hún komst að raun um að þeir mala þegar þeir fyllast streitu.
Hún rannsakaði 44 ketti, blettatígra, púmur og önnur kattardýr og komst að raun um að tíðni malhljóðsins er í samræmi við tíðni hljóða og titrings sem m.a. er notað til að lina sársauka og örva beinvöxt í mönnum.
