Börn, sem á vantar annað eyrað, geta nú fengið ný eyru með nýrri tímamótatækni.
Tæknina kynntu kínverskir vísindamenn í Shanghæ eftir nýja rannsókn. Börnin voru öll fædd með vanskapað ytra eyra, galla sem leggst á um eitt af hverjum 10.000 fæddum börnum.
Spegilmynd af heilbrigða eyranu
Vísindamennirnir byggðu nýju eyrun á brjóskfrumum úr börnunum sjálfum og komust þannig hjá þeirri áhættu að ónæmiskerfið afneitaði frumunum. Þar eð öll börnin voru með eitt heilbrigt eyra var unnt að gera nákvæma spegilmynd af því fyrir hina hliðina.
Meðferðin skiptist í mörg stig:
Fyrst er heilbrigða eyrað skannað til að þrívíddarprentari geti prentað speglað eyra.
Á grunni þess gera vísindamennirnir svo mót til að steypa gljúpa eftirmynd af eyranum úr lífrænu niðurbrjótanlegu efni, en á eftirmyndinni eru ræktaðar brjóskfrumur úr afmyndaða eyranu.
Þeir útvíkka líka húðina á bak við afmyndaða eyrað þannig rými verði fyrir ígræðsluna.
Eftir aðgerðina vaxa brjóskfrumurnar undir húðinni og koma smám saman í staðinn fyrir gervieyrað, sem brotnar niður jafnharðan.
Tækni skapaði reiði
Nú hafa vísindamennirnir fylgst með öllum börnunum í tvö og hálft ár og allt síðan fyrsta barnið fékk gervieyrað ágrætt hafa engin vandamál skapast.
Kveikjan að tilrauninni var bandarísk tilraun frá 1997, þegar mannseyra var ræktað á baki músar.
Sú tilraun vakti mikla reiði vegna þess að margir misskildu tilganginn.
Eyrað vex eftir sérsniðinni eftirmynd
Nákvæmar skannanir og niðurbrjótanleg eftirlíking tryggir að húðin sé úr eigin frumum og vaxi í nákvæmlega réttar fellingar.
1. þrep: Skönnun mælir eyrað og speglar það. Þrívíddarprentari skapar mót fyrir niðurbrjótanlega ígræðslu.
2. þrep: Á bak við afmyndaða eyrað er húðin teygð út til að skapa rými fyrir ágræðslumótið.
3. þrep: Þegar húðin hefur vaxið nægjanlega og æðar hafa myndast í henni, fjarlægir læknirinn litlu blöðruna sem strekkt hefur á húðinni.
4. þrep: Á gervieyrað eru settar brjóskfrumur úr afmyndaða eyranu. Frumurnar laga sig eftir afsteypunni, sem grædd undir húð.
5. þrep: Að lokum er hluti af húð barnsins sjálfs saumaður yfir ágræðsluna, en síðan fær nýja eyrað að gróa.
Tveimur og hálfu ári eftir aðgerðina er eyrað enn heilt og nýju frumunum hefur ekki verið hafnað.
