Hvað er þallín?
Þallín er málmkennt, grátt og mjúkt frumefni. Það kemst í líkamann gegnum húð, með innöndun eða í fæðu eða drykk.
Ef það uppgötvast ekki nógu snemma til að unnt sé að stöðva verkunina með móteitri er það banvænt.
Þallín læðir sér inn í líkamann því uppbygging þess minnir á kalíum.
Frumur líkamans ná ekki að greina þarna á milli og taka því efnið til sín í þeirri trú að það sé kalíum sem m.a. er gagnlegt fyrir vökvajafnvægið.
Í frumunum truflar þallín m.a. prótín og mikilvæg efnaskipti.
Þallín brýtur niður frumur
Eiturefnið þallín ræðst á taugar og líffæri og drepur á löngum tíma.
1. Þallín kemst í líkamann
Þallín er vatnsleysanlegur málmur og kemst því auðveldlega inn í líkamann – ekki aðeins í mat, heldur einnig gegnum húð eða innöndun.
2. Fruman plötuð
Þallín dreifir sér um líkamann sem jónir og minnir mjög á steinefnið kalíum. Frumurnar taka til sín þallín í þeirri trú að það sé kalíum.
3. Þallín eyðileggur frumur
Þallín truflar lífsnauðsynlega starfsemi í frumum og því brotna taugar, vöðvar, hársrætur og líffæri niður en það getur tekið vikur.
Einkenni þallíneitrunar
Áhrifin koma í ljós eftir tvo sólarhringa og þá sem uppköst og niðurgangur.
Þallín veldur líka sköddun á taugakerfinu eftir fáeina daga þannig að fórnarlambið fær verki, missir tilfinningu, fær minnisgloppur eða verður vitskert.
Vegna taugaskemmda hafa fórnarlömb nefnt þá tilfinningu að ganga um á glóandi kolum. Eftir tvær til þrjár vikur fellur hárið af og viku síðar getur hjartað gefist upp.
Banvænn skammtur af þallíni er um eitt gramm.
Þallín sem morðvopn
Langtímaverkun efnisins hefur gert það einkar handhægt og algengt til morða.
T.d. myrti útsendari frönsku leyniþjónustunnar Félix-Roland Mournié, forystumann aðskilnaðarsinna í fyrrum nýlendunni Kamerún árið 1960 með þessu eitri.
Sem móteitur við þallíni nota menn járnríkt litarefni „Berlínarblátt“ sem tekið er daglega og vel útilátið drekkur í sig þallín og skolar því úr líkamanum.
LESTU EINNIG
