Árið 2021 sýndi rannsókn á vegum Tæknistofnunar Danmerkur að þéttni svifryks í íbúðahverfi, þar sem svokallaðar kamínur eru algengar, hækkar að meðaltali um 20% þegar þessir hitunarofnar eru kyntir. Loftmengun verður þá svipuð og á umferðargötu í stórborg.
Í rannsókninni mældu skynjarar örður undir 2,5 míkrómetrum að stærð, sem sagt 2,5 milljónustu úr metra. Samkvæmt gögnum WHO getur innöndun slíkra agna valdið hjarta- og lungnasjúkdómum ásamt krabba.
45% af loftmengun vegna heilsuspillandi öragna í Evrópu kemur frá viði í kyndingarofnum.
Bruninn getur líka haft slæm áhrif á loftgæðin innanhúss. Aldur ofnsins, síur ásamt því hvernig hann er kyntur hefur áhrif á hversu mikið af örðum berst í loftið innandyra. Mikilvægast er að hafa ofninn aldrei opinn meðan eldur logar í honum.
Ný tré taka langan tíma að fanga CO2‘ aftur
Og varðandi hnattrænt loftslag er heldur ekki gerlegt að sýkna kamínurnar.
Þegar viður er brenndur losnar sá koltvísýringur sem tréð hefur safnað upp á æviskeiðinu. Við fyrstu sýn mætti kannski álykta að bruninn sé kolefnishlutlaus þar eð aðeins losni kolefni sem tré binda jafnóðum.
En þótt við föllumst á þetta dugar það ekki því vélar í skógarhöggi og flutningum losa viðbótarkolefni.
Og auðvitað þurfum við líka að taka með í reikninginn að brennslan gerist hér og nú en nýtt tré verður áratugi að binda það kolefni sem við losum.
